گود سبور- الرباط//

أكد الناخب الوطني وليد الرگراكي، ان باب المنتخب الوطني المغربي مفتوح لحكيم زياش بشرط يلقى فريق ويكون جاهز وفالمستوى، وان الحالة ديالو ماشي هي ديال عز الدين أوناحي وحمزة إيگمان اللي عندهم فراقي وكايقلبو على فرق اخرى يمشيو لها فهاد الميراكاتو.

ووضح الناخب الوطني وليد الركراكي، خلال الإعلان ديالو على اللاعبين اللي غايكونو ضد النيجر وزامبيا برسم اقصائيات كاس العالم 2026: “حكيم زياش مازال ما وقع مع حتى شي فريق، ونتمناو يلقى حل مزيان ويلقى فريق باش نشوفو المستوى ديالو ونشوفو واش يقدر يعاونا”.

وبخصوص الهضرة اللي كاتروج بأن كاينين شي مشاكل مع حكيم زياش داكشي علاش ما بقاش كايعيط له وليد الركراكي للمنتخب المغربي، رد الناخب الوطني وكذب هذا الشي، وقال: “ما كاين حتى شي مشكل مع حكيم زياش هو فقط ما عندوش فريق خاصو يلقى فريق ويكون جاهز”.

وبخصوص المقارنة ما بين عز الدين أوناحي وحكيم زياش، وضح الركراكي، وقال: “لا مجال للمقارنة بين الوضع ديال حكيم زياش وعز الدين اوناحي، حيث اوناحي كان كايلعب مع باناثينايكوس اليوناني الموسم كامل اللي فات، ودابا كايتريني مع أولمبيك مارسيليا الفرنسي، وكايقلب على فريق”.

وزاد الركراكي وقال: “نفس الحالة ديال حمزة إيگمان هي ديال اوناحي، إيگمان ما بداش كايلعب مع رينجرز هذا الموسم وكايدابز باش يمشي لفريق آخر وعيطت له باش نعطيه الثقة”.