كود سبور//

حاول الناخب الوطني وليد الركراكي يطمن الجمهور المغربي والمتتبعين للأسود بخصوص جاهزية الدفاع ديال ليكيب ناسيونال، اللي كايعيش عدم الاستقرار منذ مدة هادي، بسبب الإصابات المتكررة ديال المدافعين المغاربة والنيفو ديالهم اللي ماشي سطابل، قبل أشهر من كأس أفريقيا2025، وقال إنهم خدامين على حلول لهذا الشي.

وهضر وليد الركراكي، وقال: “كاينة مخاطر بحال أي منتخب وفريق عندو مخاطر، وعندنا مدافعين ديال لاكس سونطرال، ونايف أگرد لاعب اللي مهم لنا، وهذا الشي قلتو ملي ما كانش عندو فريق فسبتمبر، ودابا نايف أگرد كاين معنا، ولكن إلى ما كانش هذا المشكل وخاصنا نلقاو الحل، ولكن ما نقدرش ما نلعبش أگرد باش نشوف إلى ما كانش شنو غايوقع”.

وكمل الركراكي، وقال: “شكون غايلعب مع نايف أگرد فاللاكس سونطرال؟ مازال عندنا سيمانا باش نشوفو المدافع المناسب، وحنا خدامين على هذا الشي ومشيت لقطر باش نشوف سايس حيث عندو التجربة، ودابا رجع جواد الياميق، اللي عندو تجربة حتى هو ودار كاس العالم وكؤوس إفريقيا وغانشوفو مازال شنو يقدر يعطينا، وعندنا مازال الوقت باش نشوفو حل لهذا الشي ولكن بالنسبة لدابا ما عندناش هذا المشكل ولكن كانفكرو فيها إلى وقعت”.