كود سبور- وجدة//

اعترف الناخب الوطني وليد الركراكي، بان دفاع المنتخب الوطني المغربي فيه مشكل وهذا الشي قبل اشهر قليلة من كاس افريقا 2025، ووضح انه مازال كايقلب على آكس سونطرال مزيان ويعالج مشكل التوازن فالمنتخب، واكد ان اللاعبين خاصهم يضاربو على بلايصهم.

وهضر الركراكي بعدما المغرب ربح النيجر بزز بنتيجة 2 لواحد فتيران وجدة، ضمن اقصائيات كاس العالم 2026، وقال: “كنت باغي نشوف جواد الياميق والعودة ديالو المنتخب، حتى هو عندو التجربة، ومازال كنقلب. وزاد: ونكذب عليكم الى قلت لكم لقيت الحل، واش مسألة توازن ولا مسألة لاكس سونطرال؟ كاين بزاف ديال الحوايج، كاين ليكيليبر وكايش لاكس سونطرال، كانمشيو بزاف فلاطاك ومحلولين بزاف، وكانخليو بزاف ديال المساحات، وخلينا النيجر يتيقو فالشوط الاول، وهذا الشي كايبين بلي خاصنا نخدمو على ليكيليبر، وعلى لاكس سونطرال”.

وكمل وليد الركراكي، وقال: “اي واحد من اللاعبين كايدخل خاصو يضارب على بلاصتو، ومازال عندنا 8 اشهر باش نلقاو احسن دفاع ممكن”.