كود سبور- الرباط//

اعتبر الناخب الوطني وليد الركراكي، أن الگروب اللي طاح فيه المنتخب المغربي فكأس إفريقيا “المغرب 2025″ گروب متوازن، وأكد أن الهدف ديال المنتخب المغربي هو التتويج بالكأس فالمغرب.

وقال الناخب الوطني وليد الركراكي فتصريح لـ”گود” بعد سحب قرعة كأس أفريقيا 2025: البارح ف الرباط، “حتى گروب ما ساهل والگروب اللي جينا فيه متوازن وكأس العالم عطنا إضافة تخلي أي منتخب يتحمس باش يلعب ضدنا ويبغي يربح وباينة غاتكون أحسن كوب دافريك اللي تدارت فالتاريخ”.

وكمل الركراكي وقال: “لاعبين كأس إفريقيا عندنا فالدار وقدام الجمهور ديالنا والهدف ديالنا هو نربحو اللقب ونديرو مستوى كبير، الگروب متوازن، حنا تايقين فريوسنا وبغينا الجمهور ديالنا يشجعنا باش نفرحو مجموعين”.

وطاح المنتخب الوطني المغربي فگروب A مع منتخبات زامبيا، مالي، جزر القمر، ومعولين المغاربة فهاد النسخة باش تبقى فالمغرب، ويكون ثاني لقب للأسود بعد اللقب الوحيد اللي تربح عام 1976.

https://www.facebook.com/share/v/188yevNoUk/?mibextid=wwXIfr