كود سبور//

كشف الناخب الوطني وليد الركراكي على اسباب عودة كابيتان المنتخب المغربي رومان سايس لليكيب ناسيونال، من خلال الماتشات الجايين ضد زامبيا والكونگو فالكاليفيكاسيون ديال مونديال 2026، بعدما غاب على آخر جوج ماتشات ديال الأسود اللي كانو وديين.

وهضر وليد الركراكي على رومان سايس خلال ندوة صحافية اليوم الثلاثاء، وقال: “عطيت فرصة للاعبين شباب فالماتشات الوديين اللي فاتو باش نشوفهم، وخليت سايس يركز مع الفريق ديالو، ومشيت عندو للسعودية شفتو، والمستوى ديالو ما فاجنيش”

وكمل الركراكي: “عندي ديما الثقة رومان سايس سوا فالقيادة ديالو حيث كابيتان او حيث محتاجين له وديما كيعطي جهدو كامل للمنتخب المغربي والعودة ديالو شي حاجة عادية للكيب ناسيونال”.