كود سبور//

أكد وليد الركراكي، أن اللاعب الشاب مروان سنادي مهاجم اتاي بيلباو الإسباني، داخل ضمن الاهتمام ديالو، ولكن خاصو يبين شنو عندو فالمستقبل باش يعيط عليه للمنتخب المغربي ويماركي أهداف مع الفريق ديالو باش ينافس على المهاجم فليكيب ناسيونال، وبخصوص المواجهة مع بادو الزاكي مدرب النيجر، عبر الركراكي على الاحترام ديالو له حيث كان مدرب ديالو، وأكد أن الزاكي عطى بزاف للكورة المغربية.

وهضر وليد الركراكي خلال الندوة الصحافية اللي اعلن فيها اليوم الجمعة على لائحة المنتخب المغربي استعدادا لمواجهة منتخبي النيجر وتنزانيا ضمن إقصائيات كاس إفريقيا 2025، وقال: “سنادي كان فاللائحة الأولية ديال المنتخب المغربي مع الـ55 لاعب، هو لاعب جديد يالاه بدا فلاليگا، دابا لعب يمكن الماتش الخامس ولا السادس له، وماركا هدف وهو بروفايل زوين بزاف للمستقبل، والميساج الأول منا له هو درناه فاللائحة الأولية باش نقولو له راك قريب، ولكن مازال باش يدخل فهاد ليكيب خاصو يعطي ويماركي أهداف بحال كايديرو المهاجمين الآخرين بحال يوسف النصيري، وسفيان رحيمي وأيوب الكعبي، والبلاصة ديال المهاجم فالمنتخب عامرة، حمزة إيگمان مقدم أداء منذ مدة وجات الإصابة ديال الكعبي عطاتو الفرصة باش يشم ريحة الگروب ونعطيوه شوية الثقة وسنادي إلى ماركا فالمستقبل غاينافس على المهاجم فالمنتخب”.

وبخصوص مواجهة بادو الزاكي فماتش المغرب والنيجر، قال وليد الركراكي: “الماتش ضد بادو الزاكي، رجل رائع وكان مدرب ديالي وملي غانلعب ماتش ضدو كمدربين هذا شرف لنا أن 2 مدربين مغاربة يلعبو إقصائيات كاس العالم، وآخر إنجاز للمنتخب المغربي الزاكي اللي دارو وكنت معه كلاعب وهو من ناس الكورة فالمغرب وما نقدر نقول عليه غير الحاجة الزوينة”.