كود سبور//

هضر الناخب الوطني وليد الركراكي على المدافع سامي مايي المتألق مع دينامو زگرب الكرواتي، واللي كايشوفوه بزاف من المتتبعين أنه يستاهل يجي للمنتخب المغربي، بالمقارنة مع شي مدافعين عيط لهم الناخب الوطني، واللي مستواهم تراجع وأثر على دفاع المنتخب المغربي.

وقال وليد الركراكي، خلال الندوة الصحافية اللي كتسبق ماتش المغرب وليسوتو: “أنا ديما اللي عندي الاختيار وسامي مايي غادي مزيان فالشومبيونزليگ وخاصو يخدم، وأحسن مثال هو سفيان رحيمي وأيوب الكعبي وديما كانقولها هو التيران ودابا هو بدا كايرجع وكايبين، بزاف ديال اللاعبين كايستاهلو يجيو للمنتخب ولكن أنا خاصني نختار واليوم اخترت تجربة يونس عبد الحميد وأشرف داري كانعرفو وكانعرف الإمكانيات ديالو وعبد الكبير عبقار ورياض شادي اللي موعت”.

وكمل الركراكي: “سامي مايي يقدر يجي وحتى اللاعبين ديال البطولة شي 2 ولا ثلاثة اللي كايلعبو فالاكس سونطرال ولكن دابا الاختيار ديالي هو هذا”.