كود سبور//

اعتبر الناخب الوطني وليد الركراكي ان ماتش المنتخب الوطني المغربي ضد تونس ماكانش ساهل واخا كان ودي، واكد انه دابا عندو خيارات كثرة فالمنتخب عكس ما كان قبل فكاس افريقيا فالكوت ديفوار.

وقال وليد الركراكي بعد رباح المنتخب الوطني المغربي على تونس بنتيجة 2-0، البارح الجمعة فتيران فاس الكبير: “الماتش ضد تونس كان صعيب ولكن اللخر الفريق الأحسن هو اللي ربح وكنا احسن منهم وبالارقام وعنداك يقوسو لينا على حكيمي”.

وكمل الركراكي: “اللي تبدل بين كاس أفريقياً فاش خسرنا مع الكوت ديفوار ودابا، هو انه ولى عندنا البدلاء، وعندي الخطة A و B و C، واللعب بـ 4-3-3 كايخلينا نسيطرو على وسط التيران من البدية، وممكن نبدلو هاد الشي ضد البنين”.

وزاد الركراكي: “كاينين لاعبين غايبين بسبب الاصابة ومن بينهم براهيم دياز ومزراوي واكراد، ودابا كاين الخير وهذا الشي مزيان ليا، حيث ولاو عندي الخيارات وراه من قبل كنت كانضور نشوف الاحتياط ما كانلقى ما ندخل، دابا هذا الشي تبدل، وباغيين نديرو الماتش الجاي الروكور ديال 12 الرباحات متابعين”.

وبخصوص المستوى ديال يوسف النصيري وضح الركراكي ان اللاعب كايلعب مع الفريق ديالو فنربخشة بطريقة مختلفة على المنتخب المغربي، حيث الفريق التركي كايلعب بجوج مهاجمين، والمنتخب المغربي دابا كايلعب بمهاجم واحد، وقال ان النصيري كايضرب تمارة ودار ماتش مزيان ضد تونس وخلاهم يعياو هذا الشي سهل المهمة على اللي دخل بلاصتو، وكمل وقال: “المهم هو المنتخب بماركي وماشي مهاجم محدد والمنافسة بين المهاجمين ديالنا مزيانة اللي كايدخل كايقضي الغرض”.

وبالنسبة لدفاع المنتخب الوطني المغربي اللي لعب ضد منتخب تونس، وبالنظر لمجموعة من الغيابات وعدم الاستقرار والاعتماد على شي لاعبين لاول مرة بحال ادم ماسينا اللي لعب فالاكس لاول مرة بهاد الطريقة، وفعبر الركراكي على الفرحة ديالو بالمستوى اللي قدموه، وشكر حتى يوسف بلعمري على النيفو ديالو فهاد الماتش.