كود سبور//
كيسعى الناخب الوطني وليد الركراكي لضم عدد جديد من اللاعبين المغاربة من ولاد الجالية فأوروبا، اللي كيتنبأ لهم بمستقبل كبير فمجال كرة القدم سواء على مستوى الأندية أو على المستوى الدولي.
وحسب مصدر مطلع فمن بين أهداف الناخب الوطني وليد الركراكي، واللي خدام عليها حاليا خلال التواجد ديالو بفرنسا لقضاء عطلة مع العائلة ديالو، هو إقناع كل من المهاجمين إلياس حسني لاعب باريس سان جيرمان، وإلياس بنصغير لاعب موناكو، وهما اللاعبين اللي خاطفين الأضواء حاليا بالبطولة الفرنسية وكلشي كيسول واش غيلعبو المنتخب المغربي أو الفرنسي.
وليد الركراكي وحسب نفس المصدر، ما غاديش يكتفي فقط بفرنسا ولكن من المنتظر يدير جولة فعدد من الدول الأوروبية ويتلقى مع لاعبين أخرين سواء فإطار اكتشافات جديدة أو لاعبين سبق لهم حملو توني المنتخب المغربي الأول أو الفئات السنية، فانتظار 2 ماتشات أميكو فمارس المقبل اللي غيعطيو صورة على العناصر اللي غيعتمد عليهم المنتخب فمستقبل المنافسات.
