كود سبور//

هضر الناخب الوطني وليد الركراكي، على النجم المغربي أشرف حكيمي لاعب باريس سان جرمان الفرنسي، والأهمية والتأثير ديالو فالمنتخب الوطني المغربي، وهاذ الشي بمناسبة اختيارو كأحسن لاعب إفريقي كايلعب ففرنسا، من خلال التتويج ديالو بجائزة “مارك فيفيان فوي”، واعتبر الركاركي خلال حوار له مع RFI أن الظهير الأيمن المغربي خاصو ياخد جائزة أحسن لاعب إفريقي لهذا العام، ويكون من بين المنافسين على جائزة الكورة الذهبية ديال فرانس فوتبال.

وجاوب وليد الركراكي على سؤال “واش حكيمي لاغنى عليه فالمنتخب الوطني المغربي وخاصو يكون حاضر؟” وقال: “حكيمي خاصو يكون ضروري فكل بلاصة وماشي غير فالمنتخب المغربي، وهو مهم فباريس سان جرمان، وأي فريق فالعالم غايلعب فيه غايكون حاضر رسمي وأساسي، وهو عنصر مهم لنا سوا فالتيران وسوا برا التيران”.

وجاوب الركراكي على سؤال “واش تقدر تلعب بحكيمي فالمنتخب المغربي كيفما كايلعب مع باريس سان جرمان؟”، وقال: “لا الأمر مختلف شويا، ولكن راه كايهجم ومن حقو إلى بغا بحال باريس سان جرمان، غير فالمنتخب المغربي كاينة صرامة دفاعية كثر معه، ولكن من الناحية الهجومية عندو الحرية يلعب كيفما كايلعب مع باريس سان جرمان، ومعهم كايتدرب على مدار السنة وكايعرف صحابو كثر، وحنا ما عندناش الوقت كثير باش نخدمو بزاف ديال الحوايج، وكانحاولو نخلقو ثنائي بينو بين ابرايهم دياز فالتيران على الجنب، وراه كايعرفو بعضياتهم ملي كانو صغار”.