كود سبور//

رد الناخب الوطني وليد الركراكي على المنتقدين له والمشككين فالقدرة ديالو على التتويج بكأس إفريقيا للأمم 2025، مع المنتخب الوطني المغربي، أكد أنه تايق فراسو بلي غايربح الكاس، والأكثر من هذا رد بطريقة ساخرة، معنى عليهم بأن عندهم عقدة المدرب الأجنبي، داكشي على هو كايتعرض للانتقادات القوية، حيث زعما كون كان شي مدرب أجنبي ما غاديش ينتاقدوه كيفما واقع معه هو.

وقال وليد الركراكي فتصريح له بعدما سالا الماتش الودي بين المغرب والبنين بنتيجة 1-0 لمصلحة الأسود: “فينما مشيت كاندي الألقاب وكاندير التاريخ يبغي اللي يبغي وما يبغيش اللي ما يبغيش، وباغي ندير التاريخ مع المغرب، أنا جيت للمنتخب الوطني المغربي وعندي تاريخ، ربحت مع الفتح أول لقب فتاريخهم، ومع الوداد شومبيونزليك وسولو اللي سنا ليا (سعيد الناصيري الرئيس الأسبق للوداد) إلى قدر يجاوبكم راني ملي سنيت معه فالوداد قلت له غانربح شومبيونزليگ وغانمشي بحالي وخديت البطولة مع الوداد وهما من 1992 ما داو جوج بطولات متابعين وجبت لهم البطولة الثانية، وجيت للمغرب بالثقة ديالي وبراس لأفوكا ديالي غانجيب كوب دافريك حيث هذا التاريخ وباغي نديرو، الثقة عندي والديبلومات عندي الألقاب”.

وكمل الركراكي وهضر بطريقة ساخرة وقال: “غاندير زراعة الشعر باش تقولو عليا الرگراگينيو وتهناو وتقول غانديو كاس أفريقيا مع مول الشعر.. برافو على المغاربة اللي شجعونا هنا ففاس وغانديو كوب دافريك”.