كود سبور//

حط الناخب الوطني وليد الركراكي راسو فموقف صعيب، بسبب غياب المدافع المغربي المتألق مع ماميلودي صن داونز الجنوب إفريقي عبد المنعم بوطويل على اللائحة الأولية ديال المنتخب المغربي لكاس إفريقيا 2023.

اللائحة الأولية اللي صيفط وليد الركراكي للاتحاد الإفريقي لكرة القدم الخاصة بكاس إفريقيا الكوت ديفوار، فيها 55 لاعب، غاب عليهم اسم عبد المنعم بوطويل اللي ساهم بشكل كبير فتتويج الفريق ديالو ماميلودي صن داونز الجنوب إفريقي بالسوبر ليك الإفريقي وبشكل فعال وكيتعتبر من أحسن المدافعين الممارسين حاليا فلافريك.

غياب عبد المنعم بوطويل على اللائحة الأولية حط الناخب الوطني وليد الركراكي فموقف محرج بزاف، خصوصا وأن لاليست فيها لاعبين مستواهم تراجع بالمقارنة مع بوطويل اللي متألق مؤخرا، وكاين فيهم اللي ما كايلعبش حتى مع الفريق ديالو بحال المحترف المغربي فبريست الفرنسي أشرف داري.