كود سبور//
أكد الناخب الوطني وليد الركراكي أن المنافسة داخل المنتخب الوطني المغربي ولات صعيبة بزاف، حيث النيفو طلع ديال اللاعبين مقارنة بشحال هادي، وقال إن اللي باغي يكون دابا فالمنتخب خاصو يخدم واللي غايستاهل غانعيط عليه.
وخلال الندوة الصحافية اللي دار وليد الركراكي، اليوم الخميس، من أجل الإعلان على لائحة المنتخب المغربي لمواجهة أفريقيا الوسطى برسم الجولة الثالثة والرابعة من إقصائيات كأس إفريقيا 2025، رد وليد الركراكي على المنتقدين وقال: “المنافسة اللي ولات دابا فالمنتخب الوطني المغربي ماشي هي اللي كانت من قبل، حيث سمعت شي وحدين كايقولو من قبل كانوا لاعبين ما كايلعبوش الشومبيونزليگ وكانوا كايجيو للمنتخب، ولكن المغرب ديال قبل ماشي هو المغرب ديال دابا، وغير مثلا هذا العام عندنا 5 اللاعبين اللي كايلعبو الشومبيونزليگ فأوروبا، وهذا روكور، ومن قبل كان نور الدين نايبت وطلال القرقوري وحنا لاعبين على الطيوح وفرحانين نجيو نلعبو المغرب”.
وكمل الركراكي وقال: “راه دابا غير باش تدير اللائحة الأولية بكثرة اللاعبين المزيانين ولات صعيبة، واللي بغى يدخل فاللائحة ديال 25 لاعب خاصو يخدم، حيث عندنا لاعبين فريال مدريد وبارين ميونخ ولاعبين كايلعبو فالطاليان والصبليون، والبارح لاعب من أصل مغربي عندو 17 عام لاعب شومبيونزليگ ضد ريال مدريد، سمحو ليا أنا كمدرب ديال المنتخب المغربي كانقول هادي هي الخدمة واللي غايخدم ويستاهل يكون غايكون سوى من البطولة او من برا”.