كود سبور- وجدة//

رد الناخب الوطني وليد الركراكي على المنتقدين له، اللي كايشوفو أن المنتخب المغربي ما عندوش مهاجم هداف واحد قادر يسجل الأهداف، وقال إن قوة المنتخب دابا هي أن گاع اللاعبين اللي فيه قادرين يماركيو، وأن الأسلوب ديالو يعتمد على تعدد المسجلين للأهداف، وشرط على عودة حكيم زياش وسفيان بوفال للمنتخب تكون ملي يرجعو للمستوى ديالهم.

وهضر وليد الركراكي من ورا ماتش المغرب وتنزانيا ضمن إقصائيات كاس العالم 2026، وقال فالندوة الصحافية: “ديما كانقولها، راني كانأمن بلي كل لاعب خاصو يماركي، وفالإقصائيات راه كان بنصغير ماركا 2 أهداف، وأوناحي كان كايماركي، والزلزولي كان ماركا، حنا راه فـ2025، ونتوما كاتهضرو ليا على من قبل عام وشي حاجة، سي نو جبدو ليا فرس حتى هو، حنا كانهضرو دابا على من ورا كاس أفريقيا، اللي بعد منها بدلنا أسلوب اللعب ديالنا، وكانماركيو، حنا ما عندناش مشكل ديال مهاجم صريح، راه أسلوب اللعب ديالي لا يعتمد على لاعب واحد اللي كايماركي، والقوة ديالينا دابا هي أي لاعب يقدر يماركي، مرة ابراهيم ومرة رحيمي ومرة النصيري… واليوم أكرد، وهذا الشي مزيان والفرق الكبيرة هي هادي”.

وكمل الركراكي وقال: “راه إلى عندك لاعب واحد هداف اللي كايماركي وتوعت هزك الما، وهذا هو السيستيم ديالي، وحنا ما كانعولوش على هداف واحد وإلى عولنا على هداف واحد غايكون هذا الشي صعيب علينا، وحنا خدامين مع هذا الفريق باش أي لاعب يقدر يماركي ويشكل خطر على الخصم، وأي واحد كايدخل كايقدر يعوض اللي خرج”.

وبخصوص إمكانية عودة حكيم زياش اللي كايطالبو شي فئة من الجمهور يرجع للمنتخب المغربي، قال وليد الركراكي: “بالنسبة لحكيم زياش وبوفال، راه ديما كانقولها الباب محلول لأي واحد اللي فالمستوى ويقدر يعاونا، واللي رجع فيه  فالمستوى ويقدر يعاونا غايكون معنا باش يعاون الفريق بحال أي لاعب معنا هنا دابا”.