كود سبور- وجدة//

أكد الناخب الوطني وليد الركراكي، أن طموحات الجمهور المغربي كبرات من ورا إنجاز المنتخب المغربي لدومي فينال كأس العالم 2022، واعتبر أن الجمهور المغربي عندو الحق يتقلق عليه وعلى اللاعبين، وأنهم خاصهم يتقبلو هذا الشي حيث المنتخب دابا كبر، وقال إن المغاربة كانوا كايفرحو بالتأهل لكأس إفريقيا وكأس العالم، ودابا والمنتخب اللي تقريبا تأهل لمونديال 2026، جاهم هذا التأهل عاديا.

وهضر وليد الركراكي فتصريح له بعدما المنتخب المغربي ربح منتخب تنزانيا بنتيجة 2 لزيرو ضمن إقصائيات كأس العالم، وقال: “ملي كنت مساعد مدرب فالمنتخب الوطني المغربي، كنا ربحنا الموزمبيق، والمغاربة خرجو للزنقة فرحانين بالتأهل لكاس أفريقيا، وكانعقل ملي تأهل لكاس العالم 2018، خرجو الجمهور وحنا تقريبا مكالفيين دابا ولكن ولا هذا الشي عادي، راه ملي شديت المنتخب المغربي هذا الشي اللي كنت باغي، والجمهور يبغي ولا ما يبغيش، وحاجة عادية هادي ولكن أنا راني فرحان حيث ولينا فريق كبير، ودابا يقدر الجمهور يقول يا راس لافوكا بلا ما تتفلا علينا راه التأهل لكاس العالم شي حاجة عادية”.

وكمل الركراكي وقال: “مزيان هذا الشي، يعني كبرنا الفريق ودابا كايتسناو منا كثر، وأنا كمدرب كانقول للاعبين خليو الجمهور يتقلقو ملي نربحو غير بجوج ويتقلقو ملي نربحو بثلاثة، راه ولينا فريق كبير، والمغاربة صافي كبرو ما بقاوش باغيين غير كاس أتاي ولاو باغيين الشكلاط وكلشي، واللي ما باغيش هذا الشي ما خاصوش يگلس فبلاصتي واللاعبين اللي ما باغيش هذا الشي ما يلعبش مع المنتخب، راه وصلنا للدومي فينال ديال كأس العالم والناس باغيين كثر وحنا كانحترموهم واأنا الأول واللاعبين ديالنا كانقولو لهم عندكم الصح، وإنشاء الله غانفرحوكم كثر وغانكبرو كثر”.