كود سبور//

أكد الناخب الوطني الركراكي أن اللاعبين اللي باغيين يجيو يلعبو مع المنتخب الوطني المغربي، خاصهم يصبرو باش ياخدو الفرصة ديالهم، والباب مفتوح للجميع، واللي باغي يمشي يلعب مع منتخب آخر يمشي، والمغرب ما واقف لا على مدرب لا على لاعب وهو كناخب وطني لا يخضع للضغط.

وقال وليد الركراكي فتصريح له اليوم الثلاثاء بمركز محمد السادس لكرة القدم: “أنا واضح فهادشي، اللي باغي يمشي يلعب مع بلاد آخر يمشي يلعب مع بلاد آخر، أنا ماشي شغلي، دابا نتوما ما فهمتش هذا الفريق كبر بزاف وخاصنا نعطيو قيمة لهاد الفريق ما نبقاوش خايفين، اللاعب لمغربي اللي باغي يلعب مع المغرب مرحبا به واللي باغي يلعب مع بلاد آخر مرحبا يمشي ما غانبقاوش نبكيو على شي واحد واش معنا ولا ما معاناش”.

وكمل الركراكي: “عندنا فريق مزيان وكبر يمكن ما كاتعيقوش بهذا الشي وأنا كانفرح ملي كانشوف البلدان الأوروبية كايشوفو الدراري ديالنا اللي ما كانعيطوش لهم، ومن قبل كنا حنا اللي كانديرو هذا الشي، الميساج واضح اللي باغي يلعب مع المغرب خاصو يصبر سوا نكون أنا أو مدرب آخر خاصو يصبر، وإلى كاتبغي المغرب والمنتخب والحلم ديالك هو الدافع على هذا الفريق غاتصبر وساهلة، والشونطاج ما خدامش معيا، غاتجي تقوليا عندي هذا المنتخب عيط ليا غانقوليك مرحبا سر يا ولدي الله يسهل عليك والمغرب ما واقف لا على لعاب لا على مدرب”.