كود سبور//

نشر الإعلام الفرنسي اليوم الجمعة خبر كاذب فيه ان الناخب الوطني وليد الركراكي حط الاستقالة ديالو من تدريب المنتخب الوطني المغربي، عند الجامعة الملكية المغربية لكرة القدم، وان الأخيرة مازال ما حسمت فهاد الاستقالة واش توافق ولا ترفض.

خبر استقالة وليد الركراكي الكاذب، نشراتو منابر فرنسية كبيرة وعندها سميتها فالساحة الاعلامية والرياضية العالمية، بحال RMC وفوت ميركاتو، وهاد وسائل الإعلام ما يمكنش تطرح معلومة بحال هاكدا غير هاكاك بلاما يسربها لها شي مصدر، قبل ما تبادر الجامعة الملكية المغربية لكرة القدم وتنفي هذه الإشاعة وتكذّبها ببلاغ رسمي.

هذا الخبر الكاذب اللي خرج اليوم الجمعة، بخصوص استقالة وليد الركراكي كايبان ماشي بريء وانه كاينين أيادي وراه، والسؤال اللي كايتطرح هنا، هو واش الركراكي اللي سرب هذا المعلومة للإعلام الفرنسي بحكم العلاقة القوية اللي عندو معهم، فحاول يستغل هذا الشي باش يضغط على الجامعة الملكية المغربية لكرة القدم، لتقرير المصير ديالو دغيا، خصوصا وان “گود” كانت كشفت قبل يومين بلي حتى حاجة ما تحسمت فالمستقبل ديالو مع المنتخب الوطني المغربي، وانه غادي يقدم تقييمو للمشاركة فكاس أفريقيا وهذا التقييم راه ممكن تديرو حتى الإدارة التقنية د الجامعة، ومن بعد مرحلة التقييم غادي يوضح الركراكي التصور ديالو للخدمة مستقبلا مع المنتخب بما فيها مونديال 2026، وغادي يكون نقاش فالجامعة وبوحدها اللي عندها القرار الاخير، واش يكمل ولا يمشي بحالو، وحسب مصادر “كود” ايلى اللي قدمو الركراكي كان مقنع مبني على اساس مهني عقلاني ممكن يكون اتفاق بشروط جديدة، ولكن ايلى كان هاد الشي اللي غادي يقدمو الركراكي ما راكبش وما منساجمش مع توجه الجامعة ديك الساعة غادي يكون مدرب جديد.

هذه المعطيات كاتبين ان الخبر الكاذب اللي نشرو الاعلام الفرنسي هو خطوة ماشي بريئة، والسؤال شكون عندو مصلحة باش يعرف راسو من رجليه فهاد لافير من غير الركراكي والوكيل ديالو، وواش غايكونو هما اللي سربو هذا المعلومة المغلوطة لوسائل الإعلامي الفرنسية؟ وحتى إلى الجامعة الملكية المغربية لكرة القدم صيفطاتو بحالو، غايتقال انه هو اللي بادر وقرر يمشي بحالو وقدم استقالتو، وماشي بحال إلى تقال راه جراو عليه حيث خسر كاس أفريقيا، وراه كاين فرق فهادشي بالنسبة للصورة والسمعة ديالو كمدرب، وطبعا هذا الشي كانت الجامعة الملكية المغربية لكرة القدم على بال فيه، ومع خرجت الإشاعة ديال استقالة الركراكي مع خرجت ونفتها مباشرة، والدليل على ان المصير ديالو مازال مازال ما تحسم هو اقتصار بلاغ الجامعة على نفي الإشاعة، دون إعلان تجديد الثقة فيه، حيث هذا قرر لم يحسم بعد.