كود سبور//

أكد الناخب الوطني وليد الركراكي، أن الأسلوب د اللعب فالمنتخب المغربي والگروب د اللاعبين بدا كايبان قبل أشهر من انطلاق كاس إفريقيا 2025، وقال إن التركيبة البشرية فليكيب ناسيونال غاتبدا تستقر ابتداء من يونيو الجاي، بخصوص أيوب بوعدي لاعب ليل الفرنسي، فوضح الركراكي أنه مازال ما اختار بين المغرب وفرنسا، والمستقبل هو الكفيل بالكشف على هذا الشي.

وقال وليد الركراكي، خلال الندوة الصحافية للإعلان عن لائحة المنتخب المغربي استعدادا لمواجهة النيجر وتنزانيا ضمن إقصائيات كاس إفريقيا 2025، وقال: “بلال نادر عيطت له باش نشوفو فهاد التجمع الإعدادي، عندو بروفايل مختلف على اللاعبين اللي عندنا، وكنا نقدرو نجيبو أمير ريتشاردسون وبلحيان حتى هو ولكن كانعرفوهم وديجا شفناهم، ولكن فالتجمع الإعدادي الربعة اللي جايين غانبداو نقصو شويا ابتداء من شهر يونيو الجاي، باش التركيبة تكون تقريبا ديال كوب دافريك، والفكرة بالنسبة لأسلوب اللعب والگروب بدات كاتوضاح وهادي هي المهمة”.

وأما بخصوص أيوب بوعدي فقال وليد الركراكي: “وبالنسبة لأيوب بوعدي، هذا الشي ساهل وما كانبغيش نطول بزاف فهاد الديسكور وديما كانقول ملي كاتشوفو لاليست وكانشوفو اللاعب فين كاتقولو هو معنا، وبحال گاع الحالات بحال شمس الدين طالبي وكانهضرو مع اللاعب سوا الجامعة او الرئيس او أنا وكانبغيو احسن اللاعبين يجيو للمغرب، وأيوب بوعدي غايكون لاعب كبير فالمستقبل، وكانديرو كلشي باش يجي معنا ونهار غايكون معنا غانكونو فرحانين، وإلى ما كانش معنا غانهضرو على اللاعبين اللي معنا حيث هما اختارو المغرب، ولكن كاين توقيت لهذا الشي، أما بوعدي واش غايكون معنا او غايكون مع فرنسا فالمستقبل اللي غايقولها لنا”.