كود اسفي//

علمات كود من مصادر مطلعة، أن شكاية توصلات بها النيابة العامة عبر الرقم الأخضر الخاص بالتبليغ على الفساد والرشوة، أطاحت بموظف كيخدم فقسم الشؤون الداخلية بعمالة آسفي، بعدما تشد متلبس بتلقي رشوة قيمتها 2000 درهم.

وحسب نفس المصادر، فالقضية بدات ملي تقدم واحد المواطن بشكاية، قال فيها أنه تعرض للابتزاز من طرف الموظف المعني، اللي كان كيطالبو بمقابل مالي باش يسهل ليه الحصول على واحد الغرض الإداري.

وبتعليمات مباشرة من النيابة العامة المختصة، وبالتنسيق مع المشتكي، نصبات عناصر الشرطة القضائية فآسفي كمين محكم للمشتبه فيه، وتم توقيفو فالحين وهو كيتسلم المبلغ المالي اللي يعتقد أنه رشوة.

الموقوف تساق لمقر ولاية أمن آسفي، وتحرر فحقو محضر رسمي تحت إشراف النيابة العامة، اللي غادي تشرف على مواصلة البحث ومعرفة كل التفاصيل والحيثيات ديال القضية، قبل ما يتعرض المتهم على أنظارها فالساعات الجاية.

القضية كتجي فإطار الجهود ديال السلطات لمحاربة الفساد الإداري والرشوة، وتشجيع المواطنين على استعمال الرقم الأخضر للتبليغ على أي تجاوزات.