كود سبور//

طالبو الرجاء الرياضي العصبة الوطنية لكرة القدم الاحترافية، أنها تبرمج ماتش اتحاد التوارگة ضد حسنية أكادير ضمن الدورة 30 من البطولة الاحترافية، فنفس توقيت ماتش المنافس له على اللقب، فريق الجيش الملكي اللي لاعبين ضد الفتح الرياضي، حيث الأخير والتوارگة لاعبين على المركز الرابع اللي يقدر يكون مؤهل لكأس الكونفدرالية، وبالتالي الرجاء ما باغيينش الفتح يكونو عارفين شحال دارو التواركة ضد الحسنية، حتى لا يؤثر ذلك على الفتحيين فالماتش ديالهم ضد الجيش الملكي.

وخرجو الرجاء الرياضي بلاغ فالساعات الأولى من صباح اليوم الثلاثاء، وقالو فيه: “نادي الرجاء الرياضي يدعو العصبة الوطنية لكرة القدم الاحترافية إلى تحمل مسؤوليتها كاملة من خلال العمل على تطبيق مبدأ تكافؤ الفرص، وذلك ببرمجة مقابلة تواركة ضد الحسنية في نفس توقيت مقابلة الفتح ضد الجيش والرجاء ضد مولودية وجدة، بالنظر لكون اتحاد تواركة منافس مباشر لنادي الفتح الرياضي على احتلال إحدى المراكز المؤهلة للمسابقة الأفريقية، وبالنظر لكون هذا الأخير هو من سيواجه المنافس المباشر للرجاء، أي الجيش الملكي، على البطولة الوطنية لهذا الموسم”.

وأكدو الرجاء الرياضي العصبة الوطنية لكرة القدم الاحترافية: “ان من شأن برمجة هذه المقابلات في توقيت مختلف أن يؤثر على نتيجة مقابلات المتنافسين ويمس في عمق مبدأ تكافؤ الفرص”.

وكانت العصبة الوطني لكرة القدم الاحترافية قسمت فالأول الدورة 30 والأخيرة من البطولة على جوج، ودارت ماتشات الفرق اللي لاعبين على الطيوح مع باقي الماتشات ديال وسط الترتيب يوم الخميس 13 يونيو، باستثناء مولودية وجدة اللي لاعبين حتى هما على الطيوح ودارت الماتش ديالهم ضد الرجاء الرياضي اللي منافس على اللقب يوم الجمعة 14 يونيو فنفس توقيت ماتش المنافس على اللقب الجيش الملكي اللي غايلعب ضد الفتح الرياضي، قبل ما تعاود تبدل البرمجة، وتحدد مواعيد ماتشات كاع الفرق اللي لاعبين على الطيوح فوقت واحد مع الفرق اللي لاعبين على لقب البطولة، ولكن بقى الماتش ديال اتحاد التواركة ضد حسنية اكادير خالق جدل، حيث التواركة والفتح لاعبين على المركز الرابع وبزاف ديال المتتبعين كيشوفو انهم خاصهم يلعبو الماتشات ديالهم بجوج فوقت واحد، خصوصا وان الفتح لاعبين ضد الجيش الملكي منافس الرجاء على البطولة، وأن نتيجة التواركة ضد الحسنية تقدر تؤثر على الفتحيين ونتيجة الماتش ديالهم ضد ليفار.