كود سبور//

شدات بعثة الرجاء الرياضي الطريق لأكادير باش يلعبو دومي فينال كأس العرش ضد مولودية وجدة، ويحتافلو بدرع البطولة الاحترافية لكرة القدم.

وخداو الرجا الرياضي الطيارة قبل لحظات من مطار محمد الخامس فالدارالبيضاء بعدما دارو حصة تدريبية فلاكاديمي ديال النادي فمنطقة بوسكورة، وغايوصلو لمطار أكادير المسيرة ومن تما غايمشيو لوطيل يرتاحو باش غدا الاثنين يديرو آخر حصة تدريبية قبل الدومي فينال ضد مولودية وجدة، مع العلم أن الماتش غايتلعب الثلاثاء الجاي مع 8 الليل، وملي غايسالي غايتم تسليم درع البطولة الاحترافية للرجاء الرياضي بطل المغرب، فقرار غريب من العصبة الاحترافية أنها تبرمج تسليم درع مسابقة فمسابقة اخرى.

ومرشح الرجاء الرياضي بقوة للتأهل إلى فينال كأس العرش، بالنظر للأجواء المزيانة داخل الفريق بعد التتويج بلقب البطولة الاحترافية قبل أسبوع، وأيضاً، لفرق الإمكانيات مع الخصم مولودية وجدة اللي كايدوز من ظروف صعيبة بعدما طاح للقسم الثاني، ولغرابة الصدف الرجا هما اللي ربحوهم الدورة الأخيرة من البطولة فاش طاحو، ولكن فكأس العرش كتبقى كل الاحتمالات والمفاجأت واردة.