كود سبور//

قدرو الرجاء الرياضي يتأهلو إلى نهائي كأس العرش، بعد ماتش صعيب ومشوق أمام مولودية وجدة اليوم الثلاثاء فتيران أكادير، ربحو الفريق الاخضر بنتيجة 4 لـ3

وسالا الشوط الأول بين الرجاء الرياضي ومولودية وجدة بنتيجة 2 لواحد لمصلحة الفريق الأخضر، وكانو الوجديين هما السباقين للتسجيل ملي فاجأوا لاعبين الرجاء بهدف فالدقيقة 9 بواسطة يوسف أنور بعدما صيد دفاع الخضرا اللي كانو كايصحابوه تسلل.

ومن وراها تحركو الرجا وبداو كايقلبو على هدف التعادل والضغط ديالهم الكبير على مولودية وجدة غايمكنهم من تسجيل الهدف الأول بواسطة نوفل الزرهوني اللي استغل تمريرة ديال يوسف بالعامري وضرب الكورة بالراس لشبكة المولودية فالدقيقة 20، ومن وراها رجع نوفل الزرهوني وضرب الهدف الثاني والتقدم للرجاء بعدما استغل تمريرة ذكية من صابر بوكرين وسجل الهدف فالدقيقة 30، مع العلم أن الرجا زادو هدف ثالث ولكن الحكم حيدو بداعي التسلل، بالإضافة إلى كرة ضربت فالبوطو، أما الوجديين فكانو مرة مرة كايخلقو مشاكل لدفاع الرجا من خلال يوسف أنور وشعيب فيضي.

وفالشوط الثاني بقاو الرجاء كيضيعو والمدرب ديالهم جوزيف زينباو خرج لاعبين مهمين وهو مازال ما ضمن الرباح بحال صانع الألعاب صابر بوگرين اللي كان ورا صناعة الهدفين ديال الخضرا فالشوط الأول ومحمد زريدة، وهذا الشي استغلوه مزيان مولودية وجدة، وقدرو يخطفو هدف التعادل فالدقيقة 70، بواسطة شعيب فيضي اللي استغل تمريرة من يوسف أنور اللي تلاعب بدفاع الرجا وعطى الكورة لفيضي اللي ضربها نيشان لمرمى أنس الزنيتي وسالا الوقت الأصلي من الماتش تعادل بين الفريقين بجوج لجوج.

وفالشوط الإضافي الأول قدرو مولودية وجدة يتحصلو على ضربة جزاء، استغلها مزيان يوسف أنور وماركا منها الهدف الثالث للوجديين، وسط نرفزة واحتجاج قوي من لاعبين الخضرا على حكم المباراة، ووراها فالشوط الثاني ضغطو الرجا مزيان على مولودية وجدة قدر رياض بنعياد يضرب هدف التعادل الخضرا فالدقيقة 109، ومن وراها زادو الرجا ضغطو مزيان وقدرو يماركيو الهدف الرابع بواسط رياض بنعياد اللي ضرب الكورة بجهد لمرمى المولودية الوجدية فالدقيقة 119، مع العلم ان المهدي موهوب ضيع بلانتي فالدقيقة الأخيرة للفريق الاخضر، وصفر وراها الحكم بتأهل الرجا للفينال وغايلعبو مع الجيش الملكي.