كود سبور//

قرر المكتب المديري للرجاء الرياضي تعيين هشام بوشروان كمدرب مساعد فالطاقم التقني ديال مدرب الفريق، البرتغالي ريكاردو سا بينتو.

وجا تعيين هشام بوشروان كمدرب مساعد لسا بينتو، بعدما قنعو الاخير انه ضروري خاص يكون معه مدرب مساعد فاهم وعارف مزيان البطولة المغربية والاجواء ديال دوري ابطال افريقيا، وهذا الشي بعدما كان المدرب البرتغالي رافض فكرة يكون معه شي واحد فالطاقم ديالو من غير الاطر اللي جابهم يخدمو معهم وكلهم أجانب.

وكان سا بينتو سبب في رحيل عبد الكريم الجيناني مساعد المدرب السابق، والبريباراطور فيزيك التونسي عمر بن ونيس، وما بغاهمش يخدمو معه، قبل ما يبان انه خاصو مساعد مغربي حيث الكورة ما دارتش معه قبل ما يربح البارح حسنية اكادير فالبطولة.

ومن المنتظر يبدا هشام بوشروان الخدمة ديالو ابتداء من الديبلاصمون الجاي للكونگو الديمقراطية وجنوب افريقيا، فين غايلعبو الرجاء الرياضي الجولة 2 و 3 من دور مجموعات دوري أبطال افريقيا.