كود سبور//

ما بقاتش الثقة بين مكونات الرجاء الرياضي والمكتب المديري للنادي برئاسة عادل هالا والأعضاء ديالو، اللي كل مرة كايروج Hن واحد منهم قدم الاستقالة ديالو بسبب واقعة الكلاسيكو البارح الثلاثاء والخسارة فالشومبيونزليگ مع الجيش الملكي فتيران العربي الزاولي.

مصادر رجاوية، شككت في نية المكتب المديري للرجاء الرياضي برئاسة عادل هالا وأعضائه أن يقدموا الاستقالة من المناصب ديالهم، بالرغم مما يروج بللي كاين  اسم من هنا وهناك من هؤلاء الأعضاء حطو استقالتهم ولكن حتى حاجة رسمية ما كاينة، واستغربت نفس المصادر كيفاش هؤلاء الاعضاء غايقدمو الاستقالة ديالهم، ومازال النادي لم يعلن بعد على المهام ديالهم فالرجاء وباش مكلفين وشنو كايديرو، وهذا الشي ملي طلع عادل هالا رئيس خلال الجمع العام الأخير في شتنبر الماضي، وكل مرة كيتفاجؤوا بشي اسم جديد على أنه فالمكتب وگاعما كايعرفوه شكون وهو وشنو هي المهمة ديالو.

المكتب المديري للرجاء الرياضي، يعيش أزمة حقيقة في مواجهة غضب الشارع الرجاوي وإحراج كبيرة ماشي بسبب الخسارة فالكلاسيكو، اللي ممكنة فالكورة وماشي بسبب المدرب ريكاردو سا بينتو اللي اي مدرب يقدر ما تدورش معه الكورة، ولكن بسبب التوني اللي لعب به الفريق ضد الجيش الملكي، واللي وحسب المنتقدين لإدارة الرجاء تبدلت فيه خريطة المغرب بالعَلَم المغربي، قبل ساعات من الماتش، على قبل الجزائري يسري بوزوق باش يلعب المباراة حيث يروج بمحيط النادي انه شرط على ادارة الرجا يلعب الماتش بتوني ما فيهش خريطة المغرب او يغيب على مواجهة الجيش الملكي، حيث السلطات الجزائرية هدداتو، وهذا الشي اللي نفاه رئيس الرجا عادل هالا، وقال ان اللاعب حاضر فالماتش.

ولكن دخول الرجا الرياضي يوم الماتش بنفس التوني اللي تعلن قبل بيوم من المباراة انه القميص الرسمي للفريق في دوري أبطال افريقيا وكانت فيه خريطة المغرب خلال الاعلان عنه، وتحيدات الخريطة منو نهار الماتش ودار بلاصتها العلم المغرب، خلى الرجاويين يشككو فكلام الرئيس عادل هالا ويغضبو عليه وبزاف منهم يطالبوه بالاستقالة ديالو من النادي، حيث خريطة المغرب من الثوابت والى ما بغاش بوزوق يلعب يمشي بحالو گاع من الرجا اللي كان ديما فريق عندو مبادئ واخا يكون غايجيب هاد بوزوق العصبة الرابعة، وأن ثوابت الوطن خط أحمر، ومن الفوق القانون في مصلحة الرجا فمواجهة اللاعب.