كود سبور//

واصل الرجاء الرياضي التواضع فالنتائج ديالو هذا الموسم بتعادل جديد ضد أولمبيك خريبكة مساء اليوم الثلاثاء فتيران الفوسفاط بمدينة خريبكة، ضمن الجولة 10 من منافسات البطولة الاحترافية لكرة القدم.

وسالا الماتش ما بين أولمبيك خريبكة وضيفو الرجاء الرياضي بالتعادل زيرو لزيرو قدام أنظار عزيز البدراوي رئيس الخضرا ونظيرو الخريبكي يوسف ججيلي، وكان مستوى الفريقين جد متوسط، مع العلم أن الأوصيكا سجلت 2 بيوتا ولكن حيدهم الحكم الأول بداعي خطأ من بعد تدخل الماتش والثاني بداعي التسلل، وكانوا الخريبكيين يقدرو يخطفو الرباح بالكونتر اتاك اللي كانوا كيدريو فالوقت اللي افتقد فيه الرجاء لبناء اللعب وكان الهجوم ديال الفريق مرة أخرى ضعيف.

وتقاسم أولمبيك خريبكة والرجاء الرياضي نقاط الماتش ودخل كل فريق نقطة، ورفعت الأوصيكا الرصيد ديالها إلى 5 النقاط وبقات فالمركز قبل الأخير، أما الرجاء الرياضي فصبح عندو 4 نقطة وظل فالمركز 6، وهذا هو التعادل الخامس ديال النسور.