كود سبور//

سبق الرجاء الرياضي الغريم ديالو الوداد فالاستعداد لديربي دومي فينال كاس العرش، اللي غيتلعب بين الفريقين يوم الاحد الجاي فتيران مركب محمد الخامس بالدار البيضاء.

وبدا الرجاء الرياضي تحت إشراف المدرب الألماني جوزيف زيمباور، كيوجد لنصف نهائي كاس العرش، ورجعو اللاعبين ديالو من عطلة العيد، والفريق عندو حصة تدريبية جديدة اليوم بلاكاديمي ديال النادي.

وبالمقابل فالوداد الرياضي من المنتظر يبدا غدا الاثنين حتى هو يوجد للماتش ضد الرجاء، بعدما يرجعو اللاعبين ديالو من العطلة اللي عطاهم المدرب سفين فاندربروك، واللي فيها 9 أيام باش يرتاحو من عيا ليماتش اللي دازو فالبطولة وعصبة أبطال إفريقيا.

وغتكون التحضيرات مكثفة بشكل كبير وسط الرجاء والوداد هذا السيمانة استعدادا لدومي فينال كاس العرش، حيث كل فريق كيشوف فالمسابقة الفرصة الوحيدة اللي مازال عندو باش يعتق الموسم بعد ضياع لقب البطولة الاحترافية وعصبة أبطال إفريقيا.