كود الرباط//

الرابور المغربي طه فحصي المعروف بـ”الغراندي طوطو” قدم اعتذارو لكولشي اليوم، خصوصا البوليس والسلطات المحلية فكازا بسبب حادثة البولفار، وكذلك اعتذر للمغاربة لي مافمهوهش حسب تعبيرو.

طوطو اعتبر فندوة صحافية صباح اليوم بالرباط، بلي ما ناويش يقلق شي حد وبلي كاين غير سوء فهم لكلامو.

وقال طوطو “أنا ماشي خايب.. الناس مافهمونيش.. وكنعتذر للناس الكبار والصغار لي كانو حاضرين ذاك النهار” في اشارة الى السهرة لي كانت فالسويسي.

وأضاف طوطو “الراب ماشي خايب غير عندو طريقة باش كيوصل للناس لي كيفهموه، ويسمحو لينا الناس لي مافهموش وجاتهم الهضرة قاصحة بزاف.. راه ماكنديروش بالراب شي حاجة خايبة”.

وأكد طوطو “اسلوبي مغاديش يتبدل.. ساعة كندير فيها موسيقى كيف أنا”، مضيفا :”مغاديش نتخلا على الراب وغانزيد نطور فيه”.