كود سبور//

مازال كايحاولو السنغاليين يلقاو حل لـ18 مشجع سنغالي المشاغبين اللي تحكم عليهم فالرباط بالحبس ما بين 3 اشهر وعام، بعدما دارو الفوضى ففينال كاس أفريقيا فتيران مولاي عبد الله، وهجمو على الامن والمتطوعين وموظفين التيران، حيث الحكم اعلن على ضربة جزاء للمنتخب المغربي ضد المنتخب السنغالي.

ونشرت جريدة Senego السنغالية، اليوم الاثنين تصريح لأمادو شريف ضيوف، الوزير السنغالي لشؤون السنغاليين فالخارج، وضح فيه أن الحكومة السنغالية “خدامة” لتسهيل رجوع المشجعين السنغاليين إلى داكار، وهذا الشي بالتعاون الوثيق مع رئيس الجمهورية ورئيس الوزراء، وكمل: “حنا ما غافلينش على هذا الشي، ودايرين جهدنا كامل لحل الأزمة”.

الجريدة السنغالية قالت أن عائلات المشجعين السنغاليين المشاغبين ومحموعة من مشجعين المنتخب السنغالي، ناويين ينظمو مظاهرة تضامنا مع السنغاليين الـ18 اللي محكومين بالحبس فالمغرب، فالمقابل كاينين أطراف أخرى كاتطالب بحل ديبلوماسي للحفاظ على العلاقات الثنائية بين الرباط ودكار.

نفس الجريدة قالت ان الخيارات اللي مطروحة دابا هي اما الـ18 سنغالي اللي تحكمو بالحبس يدوزو العقوبة ديالهم، او رفع طلب عفو ملكي.

ووضحت الجريدة السنغالية ان الـ18 سنغالي اللي محكوم عليهم فالمغرب، قررو بشكل جماعي عدم استئناف الحكم الابتدائي، حيث خايفين يدوزو وقت اطول وهما مشدودين حيث خاصهم يتبعو المسطرة ديال الاستئناف ويتسناو الحكم.

ونقلت الجريدة عن جريدة “Sud Quotidien”، بأن الرئيس السنغالي باسيرو ديوماي فاي بادر بإرسال رسالة رسمية إلى الملك محمد السادس، كايطلب فيها على المشجعين السنغاليين الـ18 المشدودين وكايلتمس عفو ملكي عليهم، والهدف ديال السنغاليين من هذا الطلب هو يخرجو المشجعين ديالهم من الحبس والحفاظ على العلاقات الدبلوماسية والتاريخية ديال داكار مع الرباط.