كود الرباط//

التنبؤات الأخيرة اللي خرج بيها إيلون ماسك فحوار مع مجلة “ذي إيكونوميست”، صدمات العالم وحلات نقاش كبير. الذكاء الاصطناعي غايفوت الذكاء د البشر كولو فظرف 5 سنين، والخدمة غاتولي اختيارية فظرف 10 سنين.

واش هادشي كيعني بلي بنادم مابقات عندو حتى قيمة؟ الوقت اللي حددو ماسك كيبان قريب بزاف، ولكن السرعة الخيالية باش كيتطور الذكاء الاصطناعي والروبوات خلات الخبراء والاقتصاديين ياخدو هاد الهضرة بجدية كبيرة.

لحد الساعة، كان النقاش غير على وقتاش التكنولوجيا غتوصل لذكاء إنسان واحد. اليوم، التوقعات فاتت هادشي. فظرف خمس سنين، الذكاء الاصطناعي غيفوت الذكاء د المليارات ديال البشر مجموعة.

إلا تحققات هاد الهضرة، بنادم مابقاش هو أذكى كائن، والذكاء الاصطناعي مابقاش غير وسيلة كتعاونا، بل غايولي هو اللي كيقود العلم، الأبحاث، والقرارات الكبرى.

ماسك كيشوف بلي الذكاء الاصطناعي غايسالي مع الخدمة التقليدية كيف تنعرفوها، والمهن للي تستخدم العقل او المهن اليدوية غاتكلف بيها الآلات، وغايدخل بنادم لواحد العصر جديد غاتولي فيه الخدمة حاجة اختيارية، ماشي شرط باش تعيش.

وهاد التحول غايضرب حتى المفهوم التقليدي د الفلوس وغاتفقد قيمتها. وغايرجع الحل الوحيد، تيقول ماسك، هو أن الدول تولي تفرق مدخول شامل على المواطنين شهرياً باش يستهلكو.