كود سبور-بخارى//

عبر هشام الدگيگ مدرب المنتخب الوطني المغربي لكرة القدم داخل القاعة، على الاحترام ديالو لمنتخب البرازيل اللي غايلعب ضد الأسود غدا الاحد برسم ربع نهائي كاس العالم “أوزباكستان2024”، وأكد انه الأقوى فالعالم.

وقال هشام فتصريح لـ “گود”: “العامل الأساسي هو التركيز اللي عندو علاقة بالمنسوب البدني، وما عندناش مشكل فالعامل النفسي او الذهني واللاعبين متحمسين وهادي مباراة تاريخيّة مع احسن فريق فالعالم وأحسن فريق حتى فهاد النسخة من كاس العالم، وبين انه الأقوى من الاهداف اللي كايماركي واقوى ديفاع اللي عندو”.

وكمل هشام الدگيگ، وقال: “الاستراتيجيات ضروري خاصنا نبدلوها، وكاين اختلاف بين ماتش البرازيل والماتش اللي فات ضد إيران اللي لعبنا ضدهم بأسلوب والشوط الثاني لعبنا معهم بأسلوب آخر وفهاد الماتش ضد البرازيل غاتكون تغييرات اخرى”.