گود سبور- طشقند//

أكد الناخب الوطني هشام الدگيگ أن المنتخب الوطني المغربي لكرة القدم داخل القاعة، واجد للماتش الثاني ضد منتخب بنما، برسم الجولة الثانية من دور مجموعات كاس العالم للفوتسال “أوزباكستان 2024″، ووضح الدگيگ أن البنانيين عليهم ضغط كبير وخايفين من الإقصاء وهذا الشي غايخلي الماتش صعيب، وخاص المنتخب المغربي يربح باش يتأهل للدور الثاني قبل ماتش البرتغال.

وقال هشام الدگيگ فتصريح لـ گود: “ماتش بنما مصيري ومتوقعين نفس الحدة بحال الماتش اللي فات، والبناميين عليهم ضغط الإقصاء وإلى خسروا غايودعو البطولة، وحنا خاصنا نربحو باش نتأهلو قبل ماتش البرتغال، وبالنسبة للغيابات فعثمان الإدريسي ما غايكملش البطولة بسبب الإصابة القوية اللي تعرض لها ودابا بدات المنافسة وما تقدروش تبدلو شي واحد ونفس اللاعبين اللي شفتو فالماتش الأول هما اللي غايكونو فالماتش الثاني.

وزاد هشام الدگيگ وقال: “كانت أخطاء ضد منتخب بنما، كان شويا ديال الضغط وشويا الارتباك والجمهور ديال تاجيكستان أثر بشكل كبير، لكن كانت أشياء مزيانة والدليل هو الرباح وخدينا نقاط الماتش، وغادي وحاولو تفادي الأخطاء ونكونو أقوى، ونتمناو نكونو واجدين لهاد الماتش ديال بنما ونشوفو فتالية ووجه آخر وحنا جاهزين لهذه المباراة”.