كود سبور- طشقند//
أكد هشام الدگيگ مدرب المنتخب الوطني المغربي لكرة القدم داخل القاعة، أن الجمهور المغربي والمسؤولين من حقهم يشوفو ليكيب ناسيونال فالقمة، وقال أن المنافسة غاتكون قوية وخصوصا فالماتشات الاولين، وكشف انه كاين غياب واحد بالنسبة للأسود.
وقال هشام الدگيگ فتصريح لـ گود: “ما عليناش ضغط والجمهور والمسؤولين طلبهم مشروع يشوفو المنتخب المغربي فأعلى قمة فهاد المنافسة الدولية نظرا للنتائج اللي حقق مؤخرا، وماكاينش شي مدرب او منتخب جاي لهنا يقول انه غايربح للقب وهذا الشي ما كايتگالش نهائيات فمنافسة عالمية حيث المنافسة كبيرة وكبيرة بزاف وفأي ماتش ما تسناوش داكشي اللي شفتو فكوب دافريك ونتائج كبيرة وفوارق وأهداف”.
ووضح الدگيگ: “المباراة الاولى مباراة قوية وإلى قدرنا ناخدو النقاط الثلاث فراه حنا منتخب كبير وكبير بزاف حيث كلشي مستواه واحد والفوارق كاتبدا تبان ملي كاتطوال المنافسة والمباريات الاولى كلشي متخوف منها، سوى المنتخبات الكبيرة المرشحة او المنتخبات المتوسطة وهذا الضغط ديما كاناخدو تحفيز”.
وبخصوص الغيابات اللي عند المنتخب المغربي للفوتسال فأول ماتش فالمونديال ضد تاجيكستان، وقال: “ديجا بلال البقالي ويوسف جواد ما كانوش معنا والصراحة لاعبين لا يعوضون ومستواهم كبير بزاف وهذا قدر، ونفس الوقت هذه فرق للدراري الصغار وغايگولو الكلمة ديالهم كاين غير إشكال ديال نفس التجربة، وسفيان بوريط ما غايكونش فالماتش الأول بسبب الاصابة داكشي علاش قررنا نخليوه يرتاح الماتش الاول وهذا الغياب الوحيد اللي كاين واخا غياب واحد فالفوتسال كايكون مؤثر”.
