كّود – مدريد//

قالت وسائل إعلام إسبانية البارح الاربعاء، بأن شاحنة إسبانية كتحمل سلع عبارة عن أجهزة تكنولوجية عبرت بنجاح المعبر الجمركي بني انصار ووصلات لميناء الناظور.

وهاذي أول عملية نقل بضائع تتم بين مليلية والمغرب منذ غشت 2018 ملي قرر المغرب إغلاق المعابر الجمركية من جانب واحد في ظل الأزمة الدبلوماسية اللي كانت بين المغرب وإسبانيا، خاصة عندما استقبلت هذه الأخيرة زعيم البوليساريو ودخلاتو للبلاد بوثائق مزورة.

وحتى سبتة، وفق ذات المصادر، غدي تفتح لأول مرة اليوم الخميس في معبر تاراخال الجمارك التجارية، وغدي تدوز شاحنة محملة بمواد التنظيف، وهي النيت اللي رجعاتها السلطات المغربية يوم 8 يناير الماضي حيثاش كانت المعابر مازال ماواجداش تقنيا.

فسبانيا عاطيين أهمية كبيرة لهاذ الحدث حيث سبتة ومليلية تقهرو بالأزمة والاقتصاد ديالهم تخنق ومعولين بزاف على هاد المعابر الجمركية باش يتنفسو شويا، ومازال طامعين فالمغرب يخلي مواطنيه يتقضاو من سبتة ومليلية وتما عاد غدي يكون الرواج ديال بصح في المدينتين.