كود ـ وكالات//

ميساجات إلكترونية تسربات من عند الديمقراطيين فـ لجنة المراقبة فـ الكونغرس الأمريكي دارو تزلزيلة فـ مريكان، حيتاش فجْرُو قنبلة خطيرة على الرئيس دونالد ترامب والمجرم الجنسي جيفري إبستين.

الرسائل بيّنات أن إبستين، اللي كان محكوم على جرائم جنسية ومات من بعد فـ الحبس فـ ظروف غامضة، كان كيجبد ترامب بسميتو فميساجات خاصة مع شريكتو القديمة غيسلين ماكسويل والمؤلف مايكل وولف، اللي كيتحسب من الناس المقربين من دائرة ترامب.

هاد المراسلات اللي كانت بين إبستين وماكسويل، اللي كانت كتعاون إبستين باش تصيد البنات باش تاجر بهم جنسياً، فيها كلام كيشير أن ترامب دوز وقت طويل مع وحدة من البنات اللي كيقولو عليها الديمقراطيين كانت ضحية من ضحايا إبستين.

الديمقراطيين فـ لجنة المراقبة خرجو هاد الرسائل الأربعاء من بعد ما خداوها بأمر قضائي من الممتلكات ديال إبستين. المهم، ترامب ما توصل ولا جاوب على حتى وحدة منهم، والرسائل كلها كترجع قبل ما يكون رئيس، وما كاين لا اتهام رسمي ضدو لا والو.

من جهة أخرى، كارولين ليفيت، الناطقة باسم البيت الأبيض، قالت إن الديمقراطيين غير باغين يشوهو سمعة ترامب وسربو ميساجات اختاروهوم باش يديرو قصة مغلوطة. وزادت: ’’هاد القصص غير محاولة باش يحيدو الانتباه على إنجازات الرئيس التاريخية‘‘.

واحد من الميساجات بين إبستين لماكسويل كتقول :”بغيتك تعرفي أن الكلب اللي ما نبحش هو ترامب. دوز ساعات مع وحدة فداري، وخا هكاك ماعقل على الخير حتى مرة!”.

جاوباتو ماكسويل: “وايه لقتني كنفكر فهاد الموضوع…”.

العلاقة ديال ترامب لي كانت بإبستين رجعات للواجهة وسط نقاش سياسي كبير كيهضر على واش الحكومة غادي تطلق الملفات الكاملة ديال إبستين اللي مات فـ الحبس فـ 2019.