محمد سقراط-گود///

سواء قيلش لي كيبيع الماسترات او الفايقوالبوصيري ديال فاس أومول سبعطتش مليار في البير الجديد والعديد من الفاسدين لي تشدو، ولي كانوا والو وتحولوا لميليارديرات كلهم القاسم المشترك بيناتهم أنهم بداو طريقهم في الفساد من السياسة والانتخابات، التحياح في الانتخابات وجمع الأصوات والبيع والشرا في أصوات المجالس الجماعية والفساد والاستفادة من فوضى التسيير، هي لي خلقات لينا اباطرة ملايرية فاسدين كيعرفوا غير البيع والشرا في أي حاجة، واي برنامج اجتماعي او مبادرة للتنمية دارتها الدولة كينهبوها ويخرجوا  عليها، ويفرغوها من أي قيمة او فائدة اجتماعية.

الديمقراطية حاليا هي افضل ماوصل ليه الرجل الأبيض لتجنب نظام الحكم المطلق، ولكن في حالتنا حنا لي مخدينا لا حروب أهلية لا ثورات اجتماعية وسياسية من اجل تقاسم الحكم، راه الديمقراطية سبب بلاء في المغرب وماشي الحل، بالنسبة ليا المغرب والدول لي بحالو خاص تفكر في الحكامة الجيدة بحال الامارات مثلا تاحد مكيسول واش عندهم الدينقراطية او لا، كولشي عارف ان عندهم حكامة جيدة ساعد المغرب نيت في تكوينها في الامارات، بينما حنا طلينا الديمقراطية وهاحنا كنعانيو من مستغليها لعشرات السنين، العهد السابق ضاع في الصراع على الحكم وماتدار في البلاد والو، في أواخر التسعينات كان المغرب قريب يوقف في خطرة، العهد الجديد جاب معاه رؤية لتنمية البلاد ودار مشاريع كثيرة وحقا تحسنات الحياة، وكاين حاجات عمر المغاربة كانو يحلموا بيهم ولكن في نفس الوقت برامج ومبادارات عديدة ضاعت بسباب السياسيين والمنتخبين وطبعا بتمياك من رجال الداخلية، وهانتوما شوفوا غير أسواق القرب ديال المبادرة واش قضاو على الفراشة مثلا، راه اغلبهم باقي خاري وهازلي تفوت لناس معندهم علاقة بالبيع والشرا ها لي التصميم الهندسي ديالهم خرج عليهم راه فلوس ديال الشعب هادي كتضيع غير هكاك.

كوريا مثلا في الثمانينات دارو حراك اجتماعي بقيادة الطلبة من اجل الديمقراطية ماتوا وتعذبوا فيه الالاف، ووقعوا احداث ومحازر في حق الطلبة والمدنيين، وفاش خرجات كوريا من الديكتاتورية للديمقراطية بفضل هاد الحراك، راه الفساد متوقفش فيها ولكن على الأقل ولاو كيتحاسبوا ويتعاقبوا الفاسدين، والمواطنين عند أي زلة لشي مسؤول كينزلوا للشارع يبلبلوها ويدافعوا على ديمقراطيتهم، حنا موقعش عندنا هادشي، بنادم كان كيسرح في الخلا بلا كرصون حتى قالوليه اجي صوت على الشخص المناسب باش يمثلك ويدافع على حقك، والنتيجة هاحنا  كنعيشوها بعد عشرات السنين العديد من المشاريع والمبادرات المجهضة والعديد من قيليشات في كل المجالات.