كود سبور//

تبين بالفعل فشل ديربي الدار البيضاء جماهيريا، اليوم السبت فتيران مركب محمد الخامس بالدار البيضاء، برسم الدورة 26 من البطولة الاحترافية.

وقررو گروبات الوداد والرجا يقاطعو الديربي بين الفريقين، احتجاجا على مجموعة من الأشياء، من بينها الفصل 507 اللي تحكمو به عدد من عضاء الألتراس والجمهور، ومنع الجماهير من التنقل الى مدن خارج كازا باش يحضرو ماتشات كايكونو فيهم الوداد والرجا ضيوف على اندية اخرى، بالإضافة إلى الحالة التسييرية اللي وصلو لها الناديين وتقلد أشخاص ما عندهم علاقة بالوداد والرجا لرئاسة الفريقين.

الجمهور ديال الرجاء والوداد الرياضي بالمقاطعة ديالو لستاد دونور بين انه وصل لواحد النضج وواحد المستوى من الوعي، حيث خلى التيران خاوي كايصفر، والعنوان البارز هو ان مقاطعة بيضاوا وعشاق الرجا والوداد للماتش اكد فشل الديربي جماهيريا واخا المجهودات الفاشلة اللي دارت من شي جهات باش يجي الجمهور، والفضيحة ديال رئيس الوداد هشام ايت منا اللي بان فواحد الفيديو كايفرق فالوراق على بنادم فالزنقة، وشي جمعيات اللي جاو من تيط مليل باش يحضرو ويلبيو النداء كيفما قال واحد رئيس جمعية فتصريح لـ گود، انهم جاو يلبيو الندا.

راه فشل الديربي جماهيريا كايعطي رسائل واضحة للمسؤولين على الكورة فالبلاد ومختلف المتداخلين فالمجال باش يگلسو مع الجمهور يلقاو حل معهم، حيث المغرب مقبل على استضافة تظاهرات رياضية كبيرة بحال كاس افريقيا 2025 وكاس العالم 2030، وهذا الشي خاص ينخرط فيه الجمهور المغربي، وعلى رأسهم جمهور الوداد والرجا، اللي باتحادهم بهاد المقاطعة للديربي بينو على مستوى عالي من المسؤولية وحتى المغرب راه مقاطعة الجمهور للديربي كايعطي فين وصلات بلادنا فاحترام حرية التعبير والديمقراطية وان السلطات احترمت قرار الجمهور اللي ما بغاوش يجيو، واخا كاينين شي مسؤولين بان انهم مازال عندهم عقليات ديال سنوات فاتها المغرب بحال هادوك اللي خرجو يفرقو الوراق على الجمهور ومن بينهم هشام ايت منا رئيس الوداد وهادروك اللي مشاو عطاو الوراق الجمعيات.