كود سبور//

سالا الديربي بين الوداد والرجاء الرياضيين، اليوم الأربعاء فستاد دونور بالتعادل برسم الجولة 5 من البطولة الاحترافية.

وخرج الماتش تعادل زيرو لزيرو بين الفريقين، واخا الفرص اللي كانت من الجانبين ولو ان اغلبها ما خطير باستثناء شي 2 كواري ولا ثلاثة من الجانبين، مع العلم ان الوداد شدو الكورة كثر من الرجا.

الفرجة ديال هذا الديربي كانت فـ المدرجات عند الجمهور، حيث تبادلو الكورفا سود والكورفا نورد الكلاشات بالتيفوات والميساجات، وكل واحد كان كايطلعا على لاخور، اضافة إلى الكراكاج اللي شعلو وهذا الشي خلى الماتش يوقف شحال من مرة.

التعادل بين الوداد والرجا فهاد الماتش ما مزيانش لحتى واحد، وكل فريق منهم خدا غير نقطة واحد، والوداد ولات عندهم 11 نقطة ومحتلين المركز الثالث مؤقتا مع ماتش مؤجل، والرجا طلعو للصدارة مؤقتا وولات عندهم 12 نقطة.