كود سبور//

فقد الديربي بين الرجاء والوداد الرياضيين اللي ملعوب اليوم الأحد برسم الدورة 29 من البطولة الاحترافية لكرة القدم، بزاف من القيمة ديالو، واخا هاد الماتش مهم بزاف بين الفريقين اليوم، حيث النتيجة ديالو تقدر تحسم فالمتوج باللقب اللي كيتنافس عليه الفريق الأخضر مع ليفار، أو تقرب فريق النسور او العساكر للقب.

ماتش الديربي بين الرجاء والوداد غايتلعب اليوم، بعيد على المكان الطبيعي ديالو “ستاد دونور” وسط كازا، بعدما تم تهجير ماتشات الغريمين خارج مدينة الدار البيضاء بسبب الأشغال ديال مركب محمد الخامس اللي مسدود أشهر هادي، وتقرر إجراء المباراة بين الخضرا والحمرا فتيران برشيد، ونفس الشي كان فماتش لالي اللي تلعب فتيران البشير فالمحمدية، والفراقي بجوج تشدرو ملي تسد مركب محمد الخامس بالدار البيضاء، وكيلعبو فهاد الجوج تيرانات منذ أشهر، بسبب غياب ملعب بديل لستاد دونور فكازا، وهذا الشي لم يؤثر فقط على الأجواء فالمدرجات ولكن تسبب للفريقين فأزمة مالية خانقة أيضا فاتت 3 المليار، حيث كيعتامدو على مداخيل الجماهير بشكل مهم ومباشر فالميزانية ديالهم.

المباراة الكلاسيكية بين الرجاء والوداد، واللي كانت تعتبر من أحسن 10 ديربيات فالعالم والأفضل عربيا وإفريقيا، ما بقاتش كيفما كانت، حيث أغلب الديربيات اللي تلعبو فالسنوات الأخيرة كانو بلا جمهور، ولأسباب مختلفة ها كورونا، وها مقاطعة جمهور الفرقين لغلاء التذاكر او لسبب من الأسباب كيفما كان عليه الحال فروتور الموسم الماضي ملي الوداديين قاطعو الماتش احتجاجا على عزيز البدراوي رئيس الرجاء اللي كان زايد فثمن التذاكر، او لأسباب تنظيمية وأمنية، وديربي اليوم حتى هو تحكم عليه يتلعب بلا جمهور بقرار من السلطات.

وأجواء الديربي اللي كانت كتبدا فشوارع وأزقة الدار البيضاء وأحيائها التاريخية بحال درب السلطان معقل الرجاويين والمدينة القديمة معقل الوداديين، وكتعطي لمسة خاصة لكازا والبيضاويين، قبل موعد الماتش بأيام مبقاتش، واللوحات الفنية اللي كانت كتخلق جماهير “الكورفا سود” و”الكورفا نور” فكل مواجهة بين الرجاء والوداد وكانت كتزين مدرجات التيران وتغطي على المستوى الضعيف ديال الفريقين وأداء اللاعبين على أرضية الملعب، حتى هي ما بقاتش، وبالتالي الماتش ملعوب اليوم بحالا گاعما ملعوب، والدار البيضاء فقدت واحد من المعالم التراثية ديالها اللي نقدرو نصنفوه على أنه ماشي غير ماتش أو تظاهرة رياضية ولكن تراث لا مادي، كانت كتميز به العاصمة الاقتصادية للمملكة لسنوات على باقي المدن المغربية وهو الديربي،  والأكثر من هذا كان كيعرّف بالمدينة عربيا وإفريقيا وعالميا، حيث جماهير الخضرا والحمرا ولاو مشهورين وسط الجماهير العالمية وتصدرو تصنيف الألتراس فالعالم لأكثر من مرة.

الديربي اليوم بين الرجاء والوداد، كتبقى النتيجة ديالو هي المهمة، حيث ما بقات عندو جمالية بلا جمهور وحتى المستوى التقني والفني فالبطولة ضعيف بزاف، والمهم اليوم هو النتيجة بالنظر للصراع بين النسور وليفار على لقب البطولة الاحترافية والنتيجة ديالو تقدر تكون حاسمة فتحديد المتوج بالدرع، خصوصا وأن الماتش غايكون ملعوب فنفس توقيت ماتش الجيش الملكي والمغرب التطواني عن نفس الدورة، وبالتالي فالرجاء باغيين يربحو ويحافظو على حظوظهم فالتتويج باللقب ويتسناو أي تعثر لليفار المتصدرين بفارق نقطة واحدة عليهم قبل من جولة واحدة على نهاية الشومبيونا، وفنفس الوقت يربحو الواك ألي روتور، بعدما كانو ربحو فالذهاب والأكثر من هذا فطعم التتويج باللقب غايكون مختلف بالنسبة للرجاويين إذا ربحو الغريم ديالهم ذهابا وإيابا، مع العلم أن الوداد خرجو بكري من حسابات المنافسة على اللقب والمهم عندهم فهاد الماتش هو يربحو الديربي على اعتبار أنه بطولة وسط البطولة بالنظر للحزازات بين الخضرا والحمرا والشدان بين الجمهور ديالهم، وبالنسبة للوداديين ما يخليوش الرجاء يربحو اللقب على ظهرهم وينتاقمو من خسارة ديربي الذهاب.

وللإشارة فماتش الديربي بين الرجاء والوداد اليوم الاحد، هو الديربي رقم 136 بين الفريقين، ربحو الرجاء 37 ماتش منهم مقابل 34 ماتش للوداد، وتعادلو الفراقي 64 ماتش، وماركاو الرجاء 117 هدف مقابل 105 أهداف للوداد.