كود سبور//

عرف ديربي الدار البيضاء اليوم السبت فستاد دونور فشل كبير على مستوى الجمهور، حيث الجماهير والالتراس ديال الوداد والرجاء قاطعو الماتش، اللي سالا بنتيجة التعادل الايجابي واحد لواحد.

وكان مستوى الديربي بين الوداد والرجاء برسم الدورة 26 من البطولة الاحترافية لكرة القدم متوسط بزاف، وغياب الجمهور اثر بشكل كبير على النيفو ديال الفريقين، وماركاو الوداد هما الاولين بواسطة محمد رايحي من بينالتي فالدقيقة 18، وماركا التعدل للرجا الحسين رحيمي فالدقيقة 27.

وبهذه النتيجة خداو الوداد والرجاء نقطة لكل فريق، ورفع الوداد الرصيد ديالو إلى 44 نقطة ومحتل المركز الثالث، والرجا ولات عندهم 38 نقطة ومحتلين المركز السابع.

جمهور الفريقين قرر يقاطع الماتش احتجاجا على الفصل 507 اللي كايتحكامو له عدد من المنتمين للأتراس والجمهور، وبسبب المنع من التنقل لحضور ماتشات الفريقين خارج كازا وكايشوفو حتى ان الفريقين مظلومين من ناحية التحكيم، وتقلد أشخاص دون المستوى لتسيير الناديين بحال رئيس الوداد هشام ايت منا اللي مازال ما حقق الحلم ديالو بالفوز على الرجا ملي كان فالمحمدية ومازال كايتمنى.