كود -وكالات//

كيبان بلي الحرب بين مريكان وإيران ما بقاش غير مواجهة مباشرة، ولكن الصهد ديال الأزمة مشا من الخليج وشرق المتوسط حتى لأوروبا .

فهاد السياق المفوضية الأوروبية خرجات ببيان رسمي كترد فيه على تهديد الرئيس الأميركي دونالد ترامب بقطع العلاقات التجارية مع إسبانيا، بعدما رفضات مدريد تسمح لواشنطن باستعمال قواعدها العسكرية ضد إيران، المفوضية أكدات التضامن الكامل مع الدول الأعضاء، وشددات باللي السياسة التجارية اختصاص حصري للاتحاد الأوروبي، وأي رد على واشنطن غيكون منسق على مستوى التكتل كامل، ماشي قرار انفرادي ديال شي دولة بوحدها، هاد الموقف كيبين أن بروكسل مستعدة دافع على مصالحها الاقتصادية الا تطور الخلاف.

وفمنطقة الخليج علنات البحرين فتح سجل وطني للتطوع لي بغا يگاجي فالجيش، الحكومة البحرينية دعات السكان كاملين، اللي كيوصل عددهم مليون ونص، باش يتسجلو،هاد الإعلان كيعكس استعداد رسمي لأي مشكل، خصوصاً وأن المملكة كتعتبر راسها معنية مباشرة بالتطورات الأمنية فالخليج.

من جهتها وزارة الدفاع التركية قالت بلي الدفاعات الجوية اعترضات صاروخ باليستي إيراني كان قاصدها بعدما داز فوق العراق وسوريا، الصاروخ قال البيان بلي طيحاتو الناتو، بلا متسجل حتى إصابة بىشرية او ضرر مادي.