الرئيسية > الزين والحداكة > الدولية المغربية روزيلا ايان فرحانة بتألقها مع المنتخب النسوي ولبسها للتوني الوطني: هذا شعور زوين وعائلتي فخورين بيا
14/06/2021 20:00 الزين والحداكة

الدولية المغربية روزيلا ايان فرحانة بتألقها مع المنتخب النسوي ولبسها للتوني الوطني: هذا شعور زوين وعائلتي فخورين بيا

الدولية المغربية روزيلا ايان فرحانة بتألقها مع المنتخب النسوي ولبسها للتوني الوطني: هذا شعور زوين وعائلتي فخورين بيا

عفراء علوي محمدي- كود//

هذشي كان بالنسبة ليها نجاح وحلم زوين، من بعد تألقها الخميس اللي فات فالدقيقة الأولى من الماتش اللي خاضو المنتخب النسوي المغربي ضد المنتخب المالي، فاش زعزعات الشباك المالي بهدف قاتل، وكذلك فاش عطات تمريرة حاسمة سهلات تسجيل هدف ثاني، وضمنات فوز المنتخب المغربي ضد نظيرو بثلاثية نظيفة.

اللاعبة المغربية الدولية روزيلا أيان، (25 عام)، كانت متألقة فالأندية الإنجليزية للشباب أقل من 17 و19، لكن كان عندها ديما تخوف من المراحل القادمة، قبل ما تفاجأ جمهورها بهذ التألق اللافت، وهي لابسة، ولاول مرة، التوني الوطني.

وقالت نجمة نادي Tottenham Hotspur النكَليزي أن التسجيل فالدقيقة اللولة عطاها ثقة، وخلاها تهدأ أعصابها، وهذشي “كيعنيلي بزاف انا وعائلتي، اللي فرحو فاش لعبت مع المنتخب الوطني وفرحو وافتاخرو بيا”، على حساب هضرة اللاعبة المغربية.

وكتقول أيان، فتصريح ليها فموقع النادي الإنجليزي: “هذشي ماقادراش نتيقو، كان ظهور زوين كيحلم بيه كل لاعب كرة قدم، كنت بالصح متوترة قبل المباراة، حيت عمرني لعبت كرة دولية من قبل، ومكنتش على دراية بالفريق الإفريقي اللي لعبنا ضدو… شعور زوين نخليه يفتخرو بيا هكذا، ماعمرني حسيت بهذشي من قبل”.

وزادت ايان أنها تفاجآت بكثرة الهضرة عليها فالصحافة والتلفزيون، باعتبارها أول لاعبة من دوري WSL النكَليزي كتلعب مع المغرب.

وفاش وصلات للمغرب باش تلعب مع المنتخب، كان عند أيان تخوف كبير، لأنها ماكتعرفش اللعابات المغربيات، وحيت عندها مشكل ديال اللغة، بحكم أنها كبرات وتربات ف”النكَليز”، كتقول: “حاجز اللغة كان بالنسبة لي تحدي كبير، وغيخصني شوية ديال الوقت باش نتكيف مع زميلاتي اللي كيهضرو العربية والفرنسية، هذشي علاش كانت محاولة التواصل صعبة”.

ولكن واخا هكذاك “المدربون واللعابات حاولو يهضرو معايا بالنكَليزية وقللو من الفرونسي اللي كنقد نفهمهة شوية، خلاوني هكذا نحس أنه مرحب بيا، وأنا فرحانة ولو ان حاجز اللغة كان هو الجزء الصعب، ولكن كان خاص نخلي كرة القدم هي اللي تهضر عليها، وفرحت بهذ الظهور الناجح وبالفوز ديالنا”، كتقول أيان.

وكان سبق لروزيلا عبرات على الفرحة ديالها بهذ التفوق فحسابها على تويتر وقالت: “هذا حلم لأول مرة من المغرب، قريب مني ومن قلب عائلتي”.

روزيلا أيان دخلات جديدة للمنتخب الوطني النسوي، من بعد ما وضع ثيقتو فيها المدرب الجديد، رينالد بيدروس، هي وثلة من اللاعبات الدوليات المحترفات، فتشكيلة كتتضمن 23 لاعبة فالمجموع.

https://www.tottenhamhotspur.com/news/2021/june/rosella-shines-on-international-debut/

موضوعات أخرى

27/07/2021 21:30

شيافر الطاكسيات فمكناس كاعيين بسباب قرار جوج بلايص.. وشيفور لـ”كود”: مكرفصين ومتضررين ماديا ومول الطاكسي مايعقلش عليك وغيبغي روسيطتو كاملة