محمد سقراط-كود///

الدولة هي الهرگاوية الأولى وهي المسؤولة على انتاج وتوفير هرگاوة بكميات كبيرة في الشارع المغربي، بسباب عدم تطبيق القوانين بشكل صارم او عدم صياغتها من الاساس… واحد لقيتيه كياكل دلاحة ولايح قشورها حداه عطيه غرامة في البلاصة، معندوش باش يخلصها قطعها ليه من المعاونة دسيدنا وقف ليه آمو للتضامن، كاين عدة طرق المهم خاص السلوك الهرگاوي يتقام عليه غالي،  واش جابليكم الله الاوروبيين عندهم جين ديال احترام القانون والتمدن راه هادوك الدول الاسكندنافية لي رمز الحضارة حاليا كانوا فايكينك متوحشين غير ول لبارح، ولكن بالنظام والقانون والغرامات والتربية في المدارس باش ولاو رمز للحضارة .

واش الدولة غادي يغلبوها هرگاوة مغلباتهاش حتى البوليزاريو جماعة مسلحة ممولة من دول بيترولية، في كل منطقة خضراء حط مخازني وبوليسي ودورهم ماشي حفظ الامن فقط بل تحرير واستخلاص المخالفات واعتقال لي رفضوا الامتثال للقانون، راه بالقانون بقوة القانون باش حنا مفروقين على القرودة، ولكن للأسف ماشي كولشي كاين لي باغي فيه فعايل وسلوكات الانسان البدائي في الغابة ومع ذلك تلقاه كيكذب نظرية التطور وهو اكبر دليل عليها، تقدر تلقاه هو نيت شخصيا هو الحلقة المفقودة.

طفل الى دار سلوك قليل الترابي راه واليديه لي مسؤولين عليه وخاص يتلامو وفي الدول المحترمة كيحيدوه ليهم وتربيه الدولة أو تعطيه لأسرة مؤهلة للمارسة هاد الدور، هكاك الشعب الى دار سلوكات هرگاوية راه خاص تلام الدولة لأنها هي لي عندها الاليات لتقويم سلوكات واعوجاجات الشعب وتردو مسرح مطلوق جامع راسو، بحال الشعب في الدول المتحضرة، الدولة لي عندها المدارس والاعلام والسلطة بمختلف أنواعها، وتربية الشعب ماشي شي خاجة خارقة او عاد غادي يتم اكتشافها راه سبقونا ليها الناس وداروها ونجحات يكفي فقط تتبع نفس الطريق لي ساهلة ومعروفة، التوعية في البداية والعقوبات والغرامات وتطبيقها بصرامة، وهادشي راه ساهل عند الدولة الى بغات ولكن للأسف هاهي دايرة الخاطر لهرگاوة حتى طغاو وسيطرو على الفضائات العامة وخراو.