سهام البارودي – كود//
شكون العدو اللذوذ ديال السلفي بولحية ؟
المرأة!
خطأ!
السلفيين كايموتو على العيالات و كايبغيو يتمتعو بيهم و يتزوجو مثنى و ثلات و رباع ! و لكن الدم د سنانهم هوما العيالات القاريات الواعيات المستقلات ماديا هادو ماكايحملوش فيهم الشعرة ! ماكرهوهمش ينقارضو حيت خارجين ليهم من الجنب ! ماكايطوعوش ليهم !
ماكايقدروش يتمتعو بيهم كيما بغاو ! حيت عارفين انه كلما قرات المرا ووعات و كانت بخدمتها و ببزطامها ماغايقدرش يطلق عليها عروقو ! غايكون عندها رأي ! عندها شخصية ! قادرة تاخد القرارات ! عجبها الراجل هوا هاداك ماعجبهاش تقدر تطلق و تتزوج راجل احسن منو او تعيش بوحدها حيت عندها الاستقلالية المادية ماكاتجوجش باش يصرف عليها الراجل و لا باش يعتقها من دار واليديها ! عارفة راسها شنو باغا ! كان مجخمر ! كان موسخ ! كان زقرام ! كان عندو الضعف الجنسي تقدر تسيفطو فحالاتو و تبدا حياة جديدة !
و هادشي بالضبط كايخلع السلفيين ! هوما بغاو المرا تبقا ديما تحت السباط و تقبل على الراجل كيما كان و تصبر ليه على هبالو ! الراجل ديما الفوق و المرا تحت منو ! داكشي علاش كايحاربو القراية فالمدرسة هوما ماشي غرضهم الاختلاط و ديك الهضرة العوجة لا هوما غرضهم المدرسة بحد ذاتها ! غرضهم القراية ! غرضهم انه المرا غدا مايكونش عندها آكسي لمهن فحال الهندسة و الطب و المحاماة … بغاوها گاع حتى الى قرات قرات تبقا غا فدوك التخصصات الثانوية لي ماكايعطيوهاش آكسي لشي منصب كبير او وظيفة مهمة ! كايخافو من سلطة المرأة ! ماكرهوش العيالات يقراو على على التغذية و الطبخ و صافي و لا مايقراوش گاع ! كايعصبوهم العيالات الحرات ! القويات ! وا غي البيرمي ماكرهوش العيالات مايدوزوهش باش يبقا بوحدو هوا لي كايعرف يصوگ!
واحد الداعية كان مدوز شي بركة فالسعودية و قطر خدام من نيتو مؤخرا على الضرب في المدرسة المغربية و فتعليم الفتيات و في العمل د المرأة و الحاصول گاع داكشي لي كاتشجع عليه الدولة من جيهة هوا كايحاربو من جهة أخرى و آخر الخرجات ديالو هوا واحد التدوينة كايدعي فيها الآباء انهم يجوجو بناتهم مع البلوغ ! يعني غا تبلغ بنتك واخا تكون كاتقر فالسادس نوض جوجها و جمافو على القوانين الدولية و جمافو على القانون المغربي !
السلفيين دايرين فحال دونكيشوط باغين يحاربو التطور الانساني بزز و يرجعو شي افكار ديال القرون الوسطى للمجتمع ! و اذا بقينا تابعينهم راه ماشي بعيد نرجعو شي نهار لعصر العبيد و الجواري و نلقاو شي سوق نخاسة فدرب غلف كايتباعو فيه العيالات على حساب السن ديالهم و الجمال و كبر البزازل ! و البراح كايغوت هانا آ سيادنا هادي جارية من ثنين شتوكة كبيرة شوية عندها ثمنطاشرعام و لكن بزازلها كبار و سنانها مقادين و كيما كاتشوفو الترمة واقفة ! دوري دوري وريهم الترمة ! شكون گال ؟
و ينقز شي سلفي : ستالاف ريال !
يجاوبو الدلال : لا شمن ستالاف راه النعجة ساوية عشرالاف!
ينقز شي سلفي صاحبو : طنااااشر رااالف ريال !
طناش رالف ريااال
طناش راااف ريااال
شكون گال ؟
آلا اونو ! آلا دووييي! آلا رتييس ! طاااق!
يا الله الله يربح هاك الجارية ديالك بصحتك و سير عيط على شي هوندا باش ديها !
موضوعات أخرى
