سهام البارودي ـ كود//
شي لحايا ولاو كايهددو الدولة بالفوضى طاي طاي، بلا حشمة بلا حيا، كايورّيو للناس كيفاش يتحايلو على القانون، وعلى رأسهم واحد بولحية شبعان فلوس قطر والخليج وهادي سنين وهوا كايروج للأفكار الظلامية ديالو عبر المنصات الإلكترونية، ومسمّي راسو مستشار أسري (عرفتو دوك الخدامي ديال ما بعد الحداثة لي ماخدامي ما تاوزّة) كايبعيو الهضرة غير مبنية على أسس علمية! المهم ماعلينا..
هاد السيد آ سيدي كايقول للناس بلي مورا التعديلات على المدونة، ماديروش عقد الزواج وسير تزوج بالفاتحة تاتولد ودير ثبوت النسب بتنبر ديال جوج دراهم، شوف القوالب كي دايرين! هادشي كامل باش مايدير عقد يضمن فيه حقوق المراة والطفل. هادشي كامل باش المراة تبقى خاسرة من جميع النواحي…. هاد القوالب كاملة باش سيدي مولاي الراجل يكون كي المنشار طالع واكل هابط واكل، مزوج واكل، مامزوجش واكل، مطلق واكل… مهم هوا ديما الرابح الأكبر فالمعادلة الزوجية.
هاد السيد ولي فحالو كايفتارضو ديما حسن النية عند الراجل وسوء النية عند المراة، زعما الراجل غا ديري فيه الثقة وتزوجي بيه بلا عقد وحملي معاه، راه غايقيد ليك الولد فالحالة المدنية والمراة لا، واياك دير فيها الثقة ودير معاها العقد راه غايوليو عندها حقوق غايضسروها.
وهاد السيد ولي فحالو كايبينو كل نهار درجة الاحتقار ديالهم لمؤسسات الدولة، وقوانينها، زعما يا طبقو القوانين القروسطية ديالنا يا غادي نتحايلو على قوانينكم ونعنكشوها، وكايحرضو الناس على العصيان المدني راه هوا هذا بشحمه ولحمه.