يونس جواد كود طنجة ///
النقاش اللي وقع فمجلس المستشارين السيمانا اللي فاتت على شركة لنقل لمغاربة والبضائع من طنجة لطريفة ودفاع شي مستشارين من حزب الاستقلال قدام وزيرهم المكلف بالنقل فضيحة بكل المقاييس. اعضاء مجلس المستشارين عوض يدافعو على المواطنين قلبوها دفاع على شي صاحب ديالهم.
من نهار هدر سيدنا على ضرورة يكون للمغرب شركات قوية وتنافسية فالنقل البحري سواء نقل البضائع او نقل الاشخاص خرجو هادوك اللي خلاو خدمة المواطنين باش يدافعو على شركة فاشلة ما كتخلصش اللي خدامين معاها. شي زغبي خداها من طنجة المدينة فاتجاه طريفة غادي يسب نهار اللي فكر يشري بيي.
يعني كاين استغلال لتوجه سيدنا باش يعاونو شركة ما وفاتش حتى بالتزاماتها مع اللي خدام فيها.
كانت تجارب فالسابق وكلها فشلات. دابا خاص شركات ماشي غير شركة تكون تنافسية ديال بصاح. غير هو خاص شرط اساسي. كاينين لملايرية اللي كيبغيو رخص استغلال هاد الخطوط وقادرين يستثمرو ويشريو باطوات سوا فالجنوب فخط طرفاية لاس بالماس او مستقبلا لعيون لاس بالماس وحتى فالشمال بين طنجة المدينة او طنجة المتوسط وطريفة او الخزيرات بل ممكن يكونو خطوط داخلية من طنجة للداخلة او كازا للداخلة وموانئ مغربية اخرى بحال الناظور ولعيون واكادير.
الشرط اللي خاصو ديرو الدولة هو تمنع عينة من هاد المستثمرين يقربو لهاد القطاع وهم: اللي دار فالسابق الكونتر بوند فالگارو وللي عندو سوابق فتهريب المخذرات. هادو خطر على لبلاد والزبناء
محتاجين سيادة مغربية فالنقل البحري كيف عندنا سيادة فالنقل الجوي غير خاص الصرامة بزاف برفض هاد المهربين السابقين فالكارو او فالحشيش.
