كود الرباط//

فضيحة جديد لواحد مسؤول بمجلس المستشارين، بطلها رئيس لجنة فمجلس المستشارين وكا ينتمي لحزب فالأغلبية الحكومية، بحيث قرا شي خبار فايك كيدور فالسوشل ميديا وفشي مواقع بللي صافي راه عمال جداد تعينو على رأس عمالات فالدار البيضاء، ناض طلب من موظف فالمجلس يسربي يكتب ليه تهاني ويوقعهوم باسميتو ويصيفطهوم بسرعة لهاد العمال. بغا يكون أول واحد كيهنأ هاد العمال الجداد.

حسب مصادر “گود”، ملي صبح الحال، وتلقاو مصالح هاد العمالات تهاني الرئيس لهاد “العمال الجداد”، وبان بلي ما كاين لا تعيين ولا مولاي بيه، الناس طاح ليهم لعجب وكيستغربو من هاد لفضيحة: كيفاش رئيس لجنة هي أكبر لجنة فالغرفة الثانية كيهنأ عمال تعينو بلا خبار الداخلية ؟!

بطبيعة الحال، لخبار وصل لمسؤولين كبار فوزارة الداخلية لي تقلقو بزاف. يقول مصدر برلماني ل”گود”: “أواه، كيفاش هاد خينا كببارك لشي وحدين تعيينات ما كاينينش أصلا، وبرسائل رسمية فيها ترويسة الغرفة الثانية وتوقيع وكاشي. وا لحاماق هذا صافي”.

المسؤولين فوزارة الداخلية تاصلو بمسؤولين فمجلس المستشارين، وتم الاستفسار عن الأمر مع رئيس اللجنة المعني لي نكر كولشي ولصقها فموظف.

فالأخير، تم زعما توبيخ الموظف لي قبل يلعب دور المسؤول عن هاد الخطأ مقابل وعد بلي ما غا يلحقو تا شي محاسبة. وهكذا كان و مريضنا ما عندو باس.

رئيس حزبو لي تلقا هاد لخبار تقلق بزاف وقرر ينهي مهام هاد الرئيس الخفيف فهاد اللجنة المهمة جدا فانتخابات تجديد هياكل مجلس المستشارين فأكتوبر المقبل.