كود الرباط//
اليوم فمناقشة التقرير النهائي للمهمة الاستطلاعية للوقوف على شبكات توزيع وتسويق المنتجات الفلاحية، بان الصراع والانقسام لي وسط الحكومة بسباب الدلاح.
الناطق الرسمي باسم الحكومة مصطفى بايتاس، للي كيتكلم بلاصت وزير الفلاحة فالجواب على مداخلات البرلمان حول تقرير المهمة الاستطلاعية واللي تجبد فيه المخطط الأخضر، قال: “علاش منعو بعض المناطق يغرسو الدلاح واش عندهم خيارات مناش يعيشو”.
وأضاف بايتاس: “المشكل هو خصنا نوفرو ليهم الماء وهادي مسؤولية الدولة.. ماشي تدبير النذرة.. بل خاص نوفرو الما عبر التحلية”.
هاد الكلام لي قال بايتاس كيتناقض مع قرارات الحكومة، بحيث أن نزار بركة وزير التجهيز والماء، صرح أن الحكومة قررت منع دعم زراعات البطيخ ولافوكا والحوامض، لتجنب الإجهاد المائي.
وأوضح بركة، خلال حلوله ضيفا على ملتقى وكالة المغرب العربي للأنباء لمناقشة موضوع “الإجهاد المائي: التدابير المتخذة وآفاق المستقبل”، فـ15 فبراير 2023: “درنا لجنة مشتركة مع وزارة الفلاحة باش نراجعو ونشوف برنامج الجيل الأخضر باش يكون مطابق للقدرات المائية للمستقبل”.
وتابع بركة: “الداخلية والفلاحة قرروا يوقفو الدعم على لافوكا والحوامض والبطيخ الأحمر، بل أكثر من ذلك وزارتي الداخلية والفلاحة، قرروا يمنعو زراعة البطيخ فطاطا وتخيفظها لـ-70 في المائة بزاكورة باش تبقا المساحة مضبوطة”.
دبا بايتاس كيقول رأي كونطر قرارات وزارتي الداخلية والتجهيز، كيقول للوزير عبد الوافي لفتيت والوزير بركة علاش منعتو زراعة الدلاح.
وقال بايتاس بلي الواقع هو خصنا نجيبو الماء للناس ماشي ندبرو النذرة.
