كود هناء ابو علي ///

سيدنا جابها فالتسعين مع الصبليون وغيرهم. ديبلوماسي مغربي دوز سنوات طويلة وصف ل”كود” قبل يومين رسالة رئيس الحكومة الاسبانية بيدرو سانشيت للملك محمد السادس واللي نشرها بيان للديوان الملكي الجمعة 18 مارس 2022 ب”المسيرة البيضا” لا تقل اهمية على المسيرة الخضرا اللي جاب بيها والدو الحسن الثاني الصحرا ف1975 “الملك الراحل الحسن الثاني دار المسيرة الخضرا لاسترجاع الصحرا واليوم الملك محمد السادس دار مسيرة بيضا”

حدث كبير وتاريخي. كلشي تحسب برئيس الدولة الملك محمد السادس. عبد الاله بنكيران رئيس الحكومة الاسبق كان واضح فتصريحو ليه ل”كود” فالعيون نهاية الاسبوع. قال “أهنئ بكل صراحة الدبلوماسية الملكية التي يقوم بها صاحب الجلالة الملك محمد السادس فيما يخص السياسة الخارجية للبلاد بصفة عامة”.

بنكيران عارف ان هاد الانتصار لكبير كان باشراف مباشر للملك. محمد السادس فخطاب 20 غشت الاخير بمناسبة ثورة الملك والشعب هدر على هاد الموضوع. قال باللي كيشرف عليه مباشرة ودعا ل”تدشين مرحلة جديدة وغير مسبوقة، في العلاقات بين البلدين، على أساس الثقة والشفافية والاحترام المتبادل، والوفاء بالالتزامات”.

هاد الكلمات تكررو فرسالة رئيس الحكومة الاسبانية للملك.

قبل هاد الشي تحركات امور كثيرة. كلشي بدا مع وصول حكومة سانشيث. ما دارش اول زيارة للمغرب. بدا يبدل السياسة ديالو معانا. المغرب كان يتسنى يكون اكثر جرأة من رئيس الحكومة الاسبق اللي من حزبو ثاباتيرو اللي دافع على مشروع الحكم الذاتي اللي اقتارحو المغرب واشاد بيه ويكون اكثر جرأة من موقف اليميني ماريانو راخوي اللي خدا ليه بلاصتو فرئاسة الحكومة.

هاد المشاكل بقات كتزاد حتى ابريل العام اللي فات باش دخل هو وباشراف شخصي منو زعيم البوليساريو ابراهيم غالي للوگرونيو ب”لاريوخا” باش يتعالج بلا خبار المغرب وبهوية مزورة وباسبور جزائري. الرباط تقلقات. مدريد ما تسوقاتش. اعلامها ما داهاش فينا. دارو خطأ كبير بزاف.

كانت نتيجو ان المغرب هز يدو على مراقبة الحدود على سبتة. فنهار واحد دخلو 10 الاف شخص غالبيتهم اطفال. تزلزلات اسبانيا. اعلامها عاد بدا يرد البال لينا. لبلادنا. لفضيحة ابراهيم غالي.

هنا بان المخزن قافز. لعب طويل. عندو الوقت الكافي. الحكومة الاسبانية خاصها اجابات انية حقاش عندها رأي عام حاط ليها السيف على راسها. عندها احزاب كتراقب العمل الحكومي بشكل دائم. المغرب عندو الوقت وعندو اجماع طبقتو السياسية على قضية الصحرا للي هي قضية المغاربة الاولى.

المغرب رون الصبليون. كانت اصوات ضد توظيف الاطفال. حنا ف”كود” كنا ضد هاد التوظيف. ضر بصورتنا فالعالم. لكن اليوم بعد هادي 8 اشهر وفيها سحب المغرب سفيرتو كريمة بنعيش وبين العين الحمرا لاسبانيا٬ النتيجة ها هي: الحكومة الصبليونية طالبة غير السلاكة. غيرات موقفها. كيف سبق لالمانيا وغيرات موقفها من الصحرا.

هاد الشي ما داروش وزير الخارجية. ما داروش ناصر بوريطة. كان اشراف مباشر من رئيس الدولة. كيف ما وقع مع امريكا اللي عتارفات بمغربية الصحرا٬ كان مهندس هاد النجاح الديبلوماسي هو سيدنا.

سيدنا كيف اكد مصدر ديبلوماسي ل”كود” رسم وكيرسم قواعد جديدة لتعامل العالم المغرب. وصلنا لهاد “المسيرة البيضا”.