الرئيسية > آش واقع > الدفن ديال اليوسفي كان فيه ناس قلال بسباب كورونا.. ومصدر لـ”كود”: حضر لشكر والمالكي وجطو وفتح الله والعلو.. وعدد اللي دخلو للمقبرة مافاتش 15 لواحد
29/05/2020 14:30 آش واقع

الدفن ديال اليوسفي كان فيه ناس قلال بسباب كورونا.. ومصدر لـ”كود”: حضر لشكر والمالكي وجطو وفتح الله والعلو.. وعدد اللي دخلو للمقبرة مافاتش 15 لواحد

الدفن ديال اليوسفي كان فيه ناس قلال بسباب كورونا.. ومصدر لـ”كود”: حضر لشكر والمالكي وجطو وفتح الله والعلو.. وعدد اللي دخلو للمقبرة مافاتش 15 لواحد

عفراء علوي محمدي- كود//

مراسيم الدفن ديال عبد الرحمان اليوسفي، الزعيم الاتحادي المعروف والوزير الأول الأسبق، كانت باهتة بكل المقاييس، وحضرو ليها ناس قلال بزاف.

مصدر قيادي فحزب الاتحاد الاشتراكي للقوات الشعبية حضر للكَنازة، كشف ل”كَود” بللي لاليست ديال الناس اللي حضرو الدفين ديال اليوسفي، فمقبرة الشهداء، ماتعداوش 10 حتى ل15 لشخص، وهم أسرتو الصغيرة وقياديي الحزب.

وحضر تشييع جثمان اليوسفي، حسب المصدر نفسو، كل من الكاتب الأول لحزب الاتحاد الاشتراكي للقوات الشعبية، والحبيب المالكي رئيس مجلس النواب، والوزير الأول السابق ادريس جطو، بالإضافة للقيادي الاتحادي فتح الله ولعلو، كيف كشف المصدر بللي دخلات للمقبرة سيارة مجهولة، رجحو الحاضرين أنها تقدر تكون ديال وزير الداخلية، عبد الوافي الفتيت.

وأكد المصدر بللي الاتحاديين اتفقو يلتزمو بالحجر الصحي فهذ المرحلة اللي كتعرف انتشار فيروس كورونا المستجد، ولهذا ماحضرش كلشي “أما كان من الممكن يحضر لكَنازتو وتشييع جثمانو المغرب كامل، ويكونو هذ المراسيم مفتوحة للعموم”، على حد تعبيرو.

وقال بللي جميع الاتحاديين اللي جاو تقريبا بقاو خارج المقبرة، وكان العدد ديالهم قليل بالزاف، “وممكن كامو الصحافيين اللي جاو يديرو تغطية للجنازة كثر منهم”.

وللإشارة، فالسلطات بدات من الصباح داليوم الجمعة تدير فالحواجز فمنطقة الحي المحمدي عين السبع، باش تنظم حركة المرور، وتمنع بالتالي أي شخص من الوصول لمحيط المقبرة، باستثناء سكان الأحياء اللي قريبا ليها.

واليوسفي توفى هذ الصباح فصبيطار الشيخ خليفة، عن عمر ناهز 96 عام، بعد مضاعفات مفاجئة فصحتو.

والقيادي الاتحادي المعروف تختارت ليه بلاصة زوينة ومظللة فالمقبرة يتدفن فيها، بجانب عبد الله إبراهيم، ثالث وزير أول للمملكة المغربية.

موضوعات أخرى