كود كازا ////

فالمغرب كاين تطبيع خطير مع الاغتصاب. دابا هاداك سعد لمجرد اللي تمت ادانتو ابتدائيا ففرنسا فقضية اغتصاب فديك القضية الشهيرة اللي وقعات فباريس، وغادي يتم النطق بالحكم استئنافيا الجمعة اللي جاية، ومع ذلك كتلقى اللي يدافع عليه. فالبلدان اللي كتحتارم راسها يستحيل تلقى بحال هاد المغتصب شي حد يدافع عليه. يستحيل شي راديو يدوز اغانيه. يستحيل يبقى ينظم شي سهرة.

حنا عندنا وحدة اسمها مريم الابيض اللي مسمية راسها ميمي لوبلان، خارجة بوقاحة كدافع عليه. هادي اللي كتقدم لمجرد كصديق، كتنشر رواية ما عندها علاقة بالتهمة اللي كيتحاكم عليها. رواية ديال راه ام ديك البنت اللي متابعاه طلبات من المانادجر ديال لمجرد 3 مليون اورو باش بنتها تغير اقوالها.

يسحاب ليها بهادي راه بريء. اولا هادي هدرة ما قالتهاش البنت اللي ماشي قاصر وما محتاجاش امها تهدر باسمها. لنفرض ان هاد لكلام صحيح، واش هاد الام ولية عليها، اللا. يمشي يدعيها بتهمة الابتزاز. يدعي الام. راه دانتو محكمة الجنايات فباريس ابتدائيا بتهمة اغتصاب وضرب شابة تلاقاها فبواط باريسي وتعدى عليها فاوطيل سنة 2016.

اما الحكم اللي غادي يخرج ضدو قريبا راه ما غاديش يتسوق لهاد التخربيق.

لمجرد ما عندوش غير قضية وحدة. عندو سوابق فامريكا. عندو سوابق وقضايا ففرانسا. كنهدرو على اللي حطو ضدو شكاية. غادي يتحاكم ف”فار بجنوب فرنسا بتهمة ارتكاب حوادث بحال اللي متابع عليها وقعات ف 2018. مازال ما تحددش موعد ها المحاكمة .

دابا علاش كلام ميمي خطير وضد الافلات من العقاب وتطبيع مع الاغتصاب، لانها صديقة لنجوم بحال اشرف حكيمي وصديقة لرئيس الوداد البيضاوي اللي خرج على الفرقة هاد العام البرلماني الضعيف اداء فمجلس النواب عن التجمع الوطني للاحرار ورئيس بلدية المحمدية اللي عايش فكازا، ايت منة هشام. هاد الاخير ماشي مهم، المهم هو حكيمي.

الجامعة خاصها تتدخل تحميه من ارتباط صورتو بوحدة مدافعة على الاغتصاب. اصلا حكيمي مازال عندو قضية ديال شي وحدة ففرانسا اتهماتو بنفس التهمة.